Մեկնարկել է սահմանադրական բարեփոխումների մասնագիտական հանձնաժողովի ստեղծման գործընթացը։ Նշվում է, որ ստեղծվելիք հանձնաժողովում մրցութային ընթացակարգով ընդգրկվելու են 6 գիտնական-իրավաբան և հասարակական կազմակերպությունների 2 ներկայացուցիչ։
Հաշվի առնելով այն հանգամանքը, որ Սահմանադրությունը Հայաստանի Հանրապետության քաղաքացիների իրավահարաբերությունները կարգավորող գլխավոր փաստաթուղթն է, արդյո՞ք այն փոփոխելը շատ ավելի ներառական չպետք է լիներ, այսինքն՝ հանձնաժողովի ստեղծմանն արդյո՞ք ավելի լայն լսումներ չպետք է նախորդեին․ «Առաջին լրատվական»-ի հարցին Բարձրագույն դատական խորհրդի անդամ Վիգեն Քոչարյանը պատասխանեց․ «Ես համամիտ եմ ձեր ասածին։ Բայց պետք է հաշվի առնել, որ ստեղծվելիք հանձնաժողովը մասնագիտական է։ Այսինքն՝ այն բաղկացած է լինելու բացառապես իրավաբաններից, որոնց առջև խնդիր է դրվելու, որպեսզի իրավական ձևակերպումներ տան այն որոշումներին, որոնք պետք է լինեն, իհարկե, հասարակական ամենալայն քննարկումների արդյունք։ Բնական է, որ ցանկացած ձևաչափ մենք եթե փորձենք ձևակերպել սահմանադրական փոփոխությունների մասով հենց այդ խնդիրն իրականացնելուն, միշտ էլ անբավարար կլիներ։ Դա ենթադրում է, որ սահմանադրական փոփոխությունների գործընթացը պետք է լինի բաց և ներառական, և դրանում պետք է մասնակցեն մեր հասարակության բոլոր շերտերը։ Բոլոր հասարակական ու քաղաքական ուժերը պետք է հնարավորություն ունենան ներկայացնել իրենց առաջարկությունները, որպեսզի մենք ունենանք բաց քննարկում, որի արդյունքում կունենանք ավելի բարելավված, Հայաստանի համար այս փուլում պարունակող խնդիրները լուծող Սահմանադրություն»։
Այսինքն՝ դեռ չեք բացառում, որ հանրային լսումներ հնարավոր է․ «Առաջին լրատվական»-ի դիտարկմանը Վիգեն Քոչարյանը պատասխանեց․ «Կարող է նաև հենց այս հանձնաժողովը հանրությանը որոշակի լուծումներ առաջարկի։ Պետք է հաշվի առնենք, որ այո, Սահմանադրությունը երկրի հիմնական օրենքն է՝ նրանով է պայմանավորված մեր ամբողջ օրենսդրական դաշտը։ Բայց մենք պետք է նաև հասկանանք, որ դա իրոք մասնագիտական, իրավագիտական շատ կարևոր փաստաթուղթ է և, բնական է, որ նրա մշակման գործում պետք է ներգրավենք հենց մասնագետների, փորձագետների, այդ գործի գիտակների»։
Մանրամասները՝ տեսանյութում։