Ազգային Ժողովի տնտեսական հարցերի մշտական հանձնաժողովը դրական եզրակացություն է տվել «Իմ քայլը» խմբակցության պատգամավորներ Բաբկեն Թունյանի, Արտակ Մանուկյանի և Վարազդատ Կարապետյանի օրենսդրական այն նախաձեռնությանը, ըստ որի՝ պատգամավորներն առաջարկում են եկամտային հարկից ազատել մասնավոր ընկերությունների կողմից թողարկված պարտատոմսերից ստացված եկամուտը, դիվիդենտի հարկից ազատել ցուցակված ընկերությունների բաժնետոմսերը, ինչպես նաև ավելացված արժեքի հարկից (ԱԱՀ) ազատել բորսայում միջնորդական ծառայությունները։
Այս առումով Բաբկեն Թունյանը հայտարարել է՝ եթե երկրորդ ընթերցմամբ Ազգային Ժողովի կողմից այս օրինագիծը հաստատվի, ապա դա կակտիվացնի արժեթղթերի շուկան և կնպաստի տեղական ու օտարերկրյա ներդրումների հոսքին։
Տնտեսագետ Վահագն Խաչատրյանը պատգամավորների այս նախաձեռնությունը շատ ողջունելի համարեց ու դրական գնահատեց նախագիծը՝ իր հերթին շեշտելով, որ Հայաստանում արժեթղթերի շուկան այսօրվա դրությամբ չափազանց պասիվ վիճակում է, ինչն էլ իր հերթին բացասական ազդեցություն է ունենում տնտեսության վրա։
«Կարող ենք ասել, որ պարտատոմսերի շուկա ներկա դրությամբ մենք գրեթե չունենք, այսինքն՝ հիմնականում այն պայմանավորված է մեր պետական պարտատոմսերի գոյությամբ, մինչդեռ այդպես չպետք է լիներ․ այսօր 2-3 կազմակերպություններ կան, որոնք ընդգրկված են այդ շուկայում, սակայն դա, բնականաբար, չափազանց քիչ է և առավել ևս Հայաստանի տնտեսության համար սա լրջագույն բացասական երևույթ է, որովհետև պարտատոմսերի շուկան ներդրումներ ներգրավելու կարևորագույն միջոցներից մեկն է և, առհասարակ, կապիտալի զարգացած շուկա ունենալու կարևոր գրավական է։ Նախկին կառավարությունների ժամանակ այս խնդիրը տարիներ շարունակ մնում էր չլուծված և շատ դեպքերում նաև՝ օրակարգից դուրս։ Հիմա այս օրինագիծը, առաջարկվող այդ փոփոխությունները կարևոր և դրական եմ գնահատում, որովհետև սա մի լրացուցիչ հնարավորություն է՝ ներդրումների հոսք ապահովելու համար։
Ուզում եմ նկատենք նաև, որ պարտատոմսերի հետ կապված խնդիրը միայն Հայաստանում չէ, որ առկա է, այլ համարյա նույն վիճակն է նաև Վրաստանում, Ադրբեջանում և, ընդհանրապես, հետխորհրդային տարբեր երկրներում, ավելին՝ անգամ Էստոնիան, որը, որպես նախկին ԽՍՀՄ անդամ երկիր, իր տնտեսական զարգացվածությամբ ու տնտեսական բարձր ցուցանիշներով լավագույններից է համարվում, այս երկրում նույնպես պարտատոմսերի շուկան տխուր վիճակում է, որովհետև ընդամենը մեկ ընկերության ներգրավվածությամբ է պայմանավորվում իրենց պարտատոմսերի շուկայի գոյությունը՝ խոսքը «Skype»-ի մասին է, այսինքն՝ ուզում եմ ասել, որ այս ոլորտում այդ երկրների հետ մենք հավասար վիճակում ենք։ Հիմա, եթե մենք ուզում ենք աշխուժացնել վիճակը, միանշանակ, շատ լավ է, բայց պետք է սպասենք ու տեսնենք՝ արձագանքներ կլինեն դրան, թե ոչ»,- «Առաջին լրատվական»-ի հետ զրույցում ընդգծեց Վահագն Խաչատրյանը։
Մանրամասները՝ տեսանյութում։