Լուրեր
Արտահերթ ընտրությունների մասին խոսողները պարզապես չեն հարգում այս ժողովրդին. Ռուբեն Բաբայան

Կառավարությունում քննարկվել է սոցիալական աջակցության նոր հայեցակարգ: Գաղափարական տրանսֆորմացիան, որ առաջարկում է կառավարությունը հետևյալն է՝ մենք ուզում ենք, որ համակարգը մարդուն օգնի հաղթահարել աղքատությունը և ոչ թե մնա աղքատության սահմաններում:
Դեռ ամիսներ առաջ վարչապետ Ն. Փաշինյանը հայտարարեց, որ աղքատությունը մարդկանց գլխում է, և այս հայտարարությունը տարաբնույթ մեկնաբանությունների առիթ տվեց: Օրերս կառվարության նիստի ժամանակ վարչապետը բացեց փակագծերը՝ մանրամասնելով, որ Հայաստանում գործող սոցիալական աջակցության համակարգը գիտակցաբար ուղղված է եղել աղքատության կոնսերվացմանը, որպեսզի աղքատ շերտը 5000 դրամով վաճառի իր ձայնը: Իսկ նոր համակարգի հիմքում 4 կարևոր սոցիալական կարիքների բարելավման հիմնաքարեր են՝ նյութական ապահովություն, առողջություն, կրթություն և բնակարանային պայմաններ:

Թեմայի շուրջ «Առաջին լրատվական»-ի հետ զրույցում Երևանի Հովհ. Թումանյանի անվան տիկնիկային թատրոնի տնօրեն Ռուբեն Բաբայանը, անդրադառնալով դիտարկմանը, նշեց, որ ժամանակը ցույց կտա, թե որքանով գործուն կլինի այս համակարգը, բայց այն, որ այս տարբերակի մեջ կա կուռ տրամաբանություն, դա միանշանակ է. «Այս նախագծի մեջ ինձ ուրախացնում է առողջության և առաջին հերթին կրթության հարցը. ժամանակն է, որ պետությունը պատասխանատվություն վերցնի, թե ինչպիսի քաղաքացի, ինչպիսի մասնագետ է ուզում ունենալ: Կրթությունը հավասարապես պետք է հասանելի լինի բոլորին»:

Ռուբեն Բաբայանի դիտարկմամբ՝ անհրաժեշտ է համակարգային փոփոխություններ իրականացնել, և չի կարելի ամեն ինչ թողնել մեկ մարդու ուսերին: «Կառավարությունում կան և՛ ռեֆորմների գնացող, և՛ որևէ ռեֆորմի չգնացող նախարարներ: Կարևոր է, որ փոփոխությունները լինեն գիտակցված, ուսումնասիրվի աշխարհի լավագույն փորձը և առանց տատանումների գնալ բարեփոխումների ճանապարհով,- ընդգծեց մեր զրուցակիցը,- բարեփոխումների գնացող կառավարությունը կամիկաձեների կառավարություն է, որը պետք է մեծագույն կայֆ ստանա իր մասնագիտական աշխատանքից և դրա արդյունքներից և ոչ թե նրանից, թե շրջապատն ինչ կասի»:

 

Մանրամասն տեսանյութում:

  • Դիտումներ՝ *