«Արցախում նախընտրական բավականին լարված մթնոլորտ է ձևավորվել և չեմ բացառում, որ կայանալիք այդ ընտրությունները կուղեկցվեն նախընտրական բախումներով ու խժդժություններով, որովհետև այն ընթացքը, որն այսօր կա՝ հենց դրա մասին է հուշում։ Արցախի դեռևս գործող իշխանությունները խնդիր են դրել իրենց առաջ՝ ցանկացած դեմքով վերարտադրվել և Արցախի նախագահի պաշտոնում ունենալ այնպիսի մեկին, ով կսպասարկի իրենց շահերը, բայց մենք դա թույլ չենք տա։ Առաջիկայում լուրջ մրցապայքար է սպասվում»,- «Առաջին լրատվական»-ի հետ զրույցում ընդգծեց Արցախի Հանրապետության նախագահական ընտրությունների թեկնածու Ռուսլան Իսրայելյանը։
Նշենք, որ 2020 թ-ի մարտին Արցախում տեղի են ունենալու նախագահական և խորհրդարանական ընտրություններ։
Ի թիվս մյուսների՝ «Ազատ հայրենիք» կուսակցության նախագահ Արայիկ Հարությունյանի, Արցախի արտաքին գործերի նախարար Մասիս Մայիլյանի, Արցախի անվտանգության խորհրդի նախկին քարտուղար Վիտալի Բալասանյանի, Ռուսլան Իսրայելյանը նույնպես առաջադրելու է իր թեկնածությունը Արցախի նախագահի պաշտոնում։ Վերջինս նշեց, որ իր թեկնածությունն առաջադրելու մասին որոշումն ինքը կայացրել է դեռևս 2017 թ-ին։ Իսրայելյանը, սակայն, հակված չէ կարծելու, որ տեղի են ունենալու արդար և թափանցիկ ընտրություններ՝ նկատելով, որ թեկնածուների համար արդեն իսկ ապահովված չեն մրցակցային պայմաններ։
«Որոշ մարդիկ մեկ տարուց ավել է արդեն, որ օրենքի խախտմամբ՝ քարոզարշավ են իրականացնում և ոչ մեկ նրանց բան չի ասում՝ ո´չ Արցախի, ո´չ Հայաստանի իշխանությունները դրա դեմը չեն առնում»,-ասաց նա։
Մանրամասները՝ տեսանյութում։
