«Մերժված ուժերը քաղաքական ճանապարհով վերադարձի որևէ շանս չունեն, բայց կան այլ ուղիներ. այդ ուժերը համբերատար սպասում են իրավիճակի փոփոխության և արձանագրում են դա ամեն օր»,- «Առաջին լրատվական»-ի հետ զրույցում նշեց քաղաքագետ Արկադի Վարդանյանը՝ անդրադառնալով հասարակության կողմից մերժված քաղաքական ուժերի՝ իշխանությունների դեմ ուղղված քարոզչության նպատակներին:
Մեր զրուցակցի խոսքով՝ ակնհայտ է, և երկրորդ կարծիք լինել չի կարող, որ իշխանության վարկանիշը անկում է ապրում. «Պատճառն այն է, որ շատ հարցերում իշխանությունը հապաղում է, շատ հանգուցային, սկզբունքային հարցերում ցուցադրում է քաղաքական կամքի բացակայություն, և դա այդ ուժերին շանս է տալիս»:
Քաղաքագետն ընդգծեց՝ Քոչարյանի պաշտպանները շարունակում են ժամանակ ձգձգելու մարտավարությունը. «Եվ հարց է ծագում՝ ի՞նչն է այս ձգձգման նպատակը. նրանք կարծում են՝ իրավիճակ է փոխվելու, և հույսները դրել են հեղաշրջման վրա, որովհետև իրենց ամբողջ հակաքարոզչությունը հենց այդ նպատակին էլ ուղղված է»:
Եթե, օրինակ, իրավիճակը սրվի, և այսօրվա իշխանություններին աջակցող մասսան չլինի այնքան հզոր, որքան 2018-ի ապրիլ-մայիսին, ապա, Արկադի Վարդանյանի խոսքով, այսօրվա իշխանության շանսերը կտրուկ կպակասեն. «Իսկ հասարակության մեջ ավելի ու ավելի մեծ քանակությամբ մարդիկ, ովքեր տարակուսում էին, հիմա արդեն սկսել են զայրույթ արտահայտել: Օրինակ՝ ինչպե՞ս կարելի է բացատրել այն մարտավարությունը, որ Մարալիկում ցանկանում են փակել ծննդաբերական բաժանմունքը: Այսինքն՝ կամաց-կամաց բողոքի ալիքը կարող է ավելի մեծ թափ հավաքել»:
Անդրադառնալով ԱԱԾ նախկին տնօրեն Արթուր Վանեցյանի «առաջին ջութակի» դերը ստանձնելու հավակնություններին՝ Արկադի Վարդանյանն արձագանքեց. «Հիմա մենք ինչի՞ց ենք բողոքում. էդ Արթուր Վանեցյանը լուսնից իջա՞վ, իրեն ո՞վ է նշանակել ԱԱԾ տնօրեն՝ ո՛չ ես, ո՛չ դուք, ոչ էլ հասարակության պահանջով է նա նշանակվել: Եվ Արթուր Վանեցյանը լավ ա անում, ինչ անում ա. հնարավորություն ստեղծվել է, ինքն էլ անում ա էն, ինչ որ անում ա: Հնարավորություն չստեղծեի՛ք: Եվ դա վերաբերում է ոչ միայն Արթուր Վանեցյանին, այլև Վալերի Օսիպյանին՝ էն մյուս հանցագործին. նա ընդհանրապես կարկառուն հանցագործ է»:
Հարցազրույցն ամբողջությամբ՝ տեսանյութում:
