Թավշյա հեղափոխությունից հետո, պարզվեց, որ լուրջ անելիքներ ունեն ՀՀ արտգործնախարարությունը, արտերկրում ՀՀ դեսպանությունները, որոնք պետք է աշխարհին ներկայացնեին, թե ինչ փոփոխություններ են եղել Հայաստանում, դեպի ուր է ընթանում երկու տասնամյակից հետո վերաժողովրդավարացման ուղին ընտրած մեր երկիրը։ Սակայն ինչպես մյուս ոլորտներում, այնպես էլ արտանքին քաղաքականության, նկատելի էր դանդաղկոտություն, հապաղում, ոչ հստակություն։
Օրերս ՀՀ արտգործնախարարությանը հարցեր էինք հղել, որպեսզի կարողանանք ընդհանուր պատկեր կազմել, թե, ի վերջո, որո՞նք են մեր արտաքին քաղաքականության առաջնահերթությունները։
Հարցերն ու արտգործնախարարությունից ստացված պատասխանները ներկայացնում ենք ստորև։
1․Թավշյա հեղափոխությունից հետո, վերջին մեկուկես տարվա ընթացքում ՀՀ-ն քանի՞ դեսպանատուն է բացել արտերկրում, ո՞ր երկրներն են դրանք։
2․Արտերկրում գործող ՀՀ ո՞ր դեսպանություններն են միավորվել։
3․2020թ․ քանի՞ դեսպանություն է նախատեսվում բացել արտերկրում, ո՞ր երկրներում է ՀՀ-ն դեսպանություններ հիմնելու։
4․Թավշյա հեղափոխությունից հետո ո՞ր երկրներն են դեսպանություններ բացել Հայաստանի Հանրապետությունում։
5․ 2020թ․պետբյուջեով նախորդ տարիների համեմատ ավելացե՞լ է, թե՞ նվազել է արտերկրում մեր դեսպանությունների համար հատկացվող ֆինանսավորումը։
6․Նախկինում արտերկրում գործող ՀՀ դեսպանատներին ֆինանսական աջակցություն էին ցուցաբերում հայկական համայնքները։ Այսօր նույնպե՞ս աջակցություն է ցուցաբերվում, թե՞ ոչ։ Եթե այո, ապա ո՞ր երկրներում, ո՞ր համայնքների կողմից։
Ըստ այդ պատասխանի՝ 2018թ․ մայիսից առ այսօր արտերկրում բացվել է մեկ դեսպանություն՝ Կատարի Պետությունում ՀՀ դեսպանությունը, հիմնվել է Ուզբեկստանի Հանրապետությունում ՀՀ ոչ ռեզիդենտ դեսպանությունը (նստավայրը՝ ք․ Երևան)։ Իսկ ահա 2020թ․ նախատեսվում է արտերկրում բացել ՀՀ երկու դեսպանություն՝ Իսրայելի Պետությունում և Եթովպիայի Դաշնային Ժողովրդավարական Հանրապետությունում։
Նշված ժամանակահատվածում փակվել է Դանիայի Թագավորությունում ՀՀ դեսպանությունը․ Դանիայի Թագավորությունում և Նորվեգիայի Թագավորությունում ՀՀ արտակարգ և լիազոր դեսպանի լիազորությունների կատարումը համատեղության կարգով իրականացնում է Շվեդիայի Թագավորությունում ՀՀ դեսպանը։
Ինչ վերաբերում է ՀՀ-ում նոր դեսպանություններ հիմնելուն, ապա թավշյա հեղափոխությունից հետո մեր երկրում դեսպանություններ են հիմնել Սերբիայի Հանրապետությունը և Սլովակիայի Հանրապետությունը։ 2020 թ․ Երևանում դեսպանություն կբացի նաև Նիդերլանդների Թագավորությունը։
2019թ․ հիշարժան է նաև նրանով, որ օգոստոսի 16-ին Երևանում բացվել է Ուրուգվայի Արևելյան Հանրապետության գլխավոր հյուպատոսությունը։
2020թ․ պետական բյուջեով ավելացվել է դեսպանությունների համար ԱԳՆ-ին հատկացվող ֆինանսավորումը, որը պայմանավորված է արտերկրում նոր դեսպանություններ բացելու հանգամանքով։
Մեզ ԱԳՆ-ից արձագանքել են, որ արտերկրում ՀՀ դեսպանությունները հայկական համայնքների կողմից ֆինանսական աջակցություն չեն ընդունում։