Այսօր՝ հունվարի 18-ին, Ազգային ժողովում հրավիրվել է ՀՀ Ազգային ժողովի և Արցախի Ազգային ժողովի Համագործակցության հանձնաժողովի հատուկ ընդլայնված նիստ՝ նվիրված Բաքվի ջարդերի 30-րդ տարելիցին:
Արցախի և Հայաստանի միջխորհրդարանական համագործակցության հանձնաժողովը հանդես եկավ հայտարարությամբ, որը ներկայացրեց ՀՀ ԱԺ նախագահ Արարատ Միրզոյանը. «…Ադրբեջանի իշխանությունները մինչ օրս ժխտում են իրենց ցեղասպան գործունեությունները, նենգափոխում իրողությունները:… Ադրբեջանի իշխանությունների մոտ առկա էր իրենց վերահսկողության տակ գտնվող տարածքներում հայերին և նրանց գոյության բոլոր հետքերը բնաջնջելու մտադրություն:
… Հայաստան-Արցախ միջխորհրդարանական հանձնաժողովը սույն թվականի հունվարի 18-ի համատեղ նիստի արդյունքներով ոգեկոչում է 30 տարի առաջ Բաքվում զոհված մեր հայրենակիցների հիշատակը և բարձրաձայնում հայ բնակչության կորուստների արդարացի հատուցման իրավաչափությունը և արդիականությունը: Դատապարտում է Ադրբեջանական Հանրապետությունում շարունակվող պետական հայատյաց քաղաքականությունը: Վերահաստատում է՝ մարդկության դեմ հանցագործությունները չունեն վաղեմության ժամկետ, և ընդգծում է՝ անցյալում տեղի ունեցած հանցագործությունների դատապարտումը նոր հանցագործությունների կանխարգելման կարևորագույն գրավականն է: Կոչ է անում խորհրդարաններին և խորհրդարանական վեհաժողովներին, միջազգային կազմակերպություններին, իրավապաշտպան կառույցներին դատապարտել Սումգայիթի, Կիրովաբադի, Սումգայիթի հայ բնակչության նկատմամբ Ադրբեջանի կողմից իրականացված ոճրագործությունները և միջազգային մարդասիրական իրավունքի խախտումները»:
Շարունակելով ընթերցել՝ նա նշեց. «Արցախի և Հայաստանի հանրապետությունները պահանջատեր են հայերի նկատմամբ տեղի ունեցած ոճրագործությունների դատապարտման և դրանց զոհերին և իրավահաջորդներին արդարացի հատուցում տրամադրելու համար»:
Հայտարարության նախագիծը ընդունվեց միաձայն:
Մանրամասները՝ տեսանյութում: