Այսօր՝ հունվարի 18-ին, Ազգային ժողովում հրավիրվել է ՀՀ Ազգային ժողովի և Արցախի Ազգային ժողովի Համագործակցության հանձնաժողովի հատուկ ընդլայնված նիստ՝ նվիրված Բաքվի ջարդերի 30-րդ տարելիցին:
«Իմ տատը որբացել է 1920թ. Շուշիի ջարդերի հետևանքով: Նրա թոռը՝ մայրս, ծնվել և իր կյանքի առաջին տարիներն անցկացրել է Բաքվում և ճակատագրի հեգնանքով՝ պատճառը, որ նա և իր ընտանիքը փրկվել են Բաքվի ջարդերից, հակահայկական խտրականության մեկ այլ դրսևորում է, որովհետև նրա հայրը՝ պապս, կրկին ճակատագրի հեգնանքով՝ մասնակցել էր Հայրենական պատերազմին, հասել էր Բեռլին, և 1970թ. ստիպված էր եղել իր ընտանիքով տեղափոխվել Երևան: Կոնկրետ իմ ընտանիքի դեպքում կարելի է տեսնել այն հակահայկական գիծը, որ իրականացրել են հայության հանդեպ: Ցավոք, այս քաղաքականությունը շարունակում են»,- հայտարարեց ԱԺ արտաքին հարցերով հանձնաժողովի նախագահ Ռուբեն Ռուբինյանը:
Նշելով, որ «յան» ազգանունով մարդիկ չեն կարող մուտք գործել Ադրբեջան՝ Ռուբինյանն ասաց. «Սա խայտառակություն է ոչ միայն Ադրբեջանի, այլև ամբողջ Եվրոպայի, աշխարհի համար. հայատյացությունը միայն հայերի հարցը չէ, այլ այն պետք է լինի ամբողջ աշխարհի հարցը»:
«Ադրբեջանին Արցախը պետք է որպես տարածք՝ առանց մարդկանց, և Ադրբեջանը նպատակային քաղաքականություն է որդեգրել հայերին բնաջնջելու իրենց պատմական հայրենիքի այս հատվածից ևս: Սրան ի պատասխան՝ ես ուզում եմ ասել՝ արցախցիների կյանքը սակարկման ենթակա չէ, Արցախի ժողովրդի անվտանգությունը զիջման ենթակա չէ Ադրբեջանի հայատյաց և բռնապետական ռեժիմին, և այլևս երբեք պատմական մեր հայրենիքում չեն լինելու հակահայկական ջարդեր, որովհետև մենք դա թույլ չեն տալու:
Մանրամասները՝ տեսանյութում:
