Այսօր՝ հունվարի 18-ին, Ազգային ժողովում հրավիրվել է ՀՀ Ազգային ժողովի և Արցախի Ազգային ժողովի Համագործակցության հանձնաժողովի հատուկ ընդլայնված նիստ՝ նվիրված Բաքվի ջարդերի 30-րդ տարելիցին:
«Բաքվի ջարդերը դարասկզբին Օսմանյան կայսրության կողմից իրականացված Ցեղասպանության շարունակությունն էին՝ նույն ձեռագիրն էր, նույն գործելաոճը»,- հայտարարեց «Իմ քայլը» խմբակցության պատգամավոր Սասուն Միքայելյանը:
Նա նշեց, որ ինքը ականատես է եղել Մարաղայի կոտորածներից մազապուրծ եղածներին. «Երբ վիրավորված հիվանդանոցում էի, մի կնոջ էին բերել Մարաղայից: Նրան ազերիները կապել էին մեքենայից, քարշ տվել, մարմինը մաշվել էր, մնացել էին գրեթե միայն ոսկորները: Բարեբախտաբար, բժիշկների շնորհիվ նա փրկվեց: Նման անմարդկային վերաբերմունքի էին արժանանաում ոչ միայն կենդանի մարդիկ, այլև մեր նահատակված ընկերները»:
Սասուն Միքայելյանի խոսքով՝ քաղաքակիրթ մարդկությունը պետք է գնահատական տա կատարվածին և իր աջակցությունը հայտնի ահաբեկչության դեմ պայքարի ելած հայ ժողովրդին: «Մենք իրավունք ունենք աշխարհից պահանջելու ոչ միայն դատապարտում, այլև այդ դեպքերի կրկնման իսպառ բացակայությանն ուղղված գործուն քայլեր: Չպետք է հույս ունենաք, որ ժամանակը կարող է փոխել մարդասպաններին»,- ասաց նա՝ հիշեցնելով ապրիլյան քառօրյա պատերազմը:
Պատգամավորը հավելեց՝ քանի դեռ աշխարհը չի կարող կանխել Ցեղասպանության կրկնությունը, մեզ մնում է ապավինել միայն սեփական ուժերին. «Իսկ դրա միակ երաշխիքը մեր միասնականությունն է: Եկեք պարտավորվենք, որ մեր միասնականությամբ և բռունցքված կամքով երբեք այլևս թույլ չենք տալու, որ մեր նկատմամբ որևէ ցեղասպանության որևէ փորձ ձեռնարկվի»:
Մանրամասները՝ տեսանյութում: