Այսօր՝ հունվարի 18-ին, Ազգային ժողովում հրավիրվել է ՀՀ Ազգային ժողովի և Արցախի Ազգային ժողովի Համագործակցության հանձնաժողովի հատուկ ընդլայնված նիստ՝ նվիրված Բաքվի ջարդերի 30-րդ տարելիցին:
Ինչպես հայտարարեց ԱԺ նախագահ Արարատ Միրզոյանը՝ ուղիղ 30 տարի առաջ իշխանությունների թողտվությամբ տեղի ունեցան Բաքվի ջարդերը. «Մարդիկ սպանվեցին միայն այն պատճառով, որ նրանք հայեր էին. 1915-ի նույն ձեռագիրն էր»:
Նա ընդգծեց, որ հայատյացության այդ քաղաքականությունը դրսևորվեց նաև 21-րդ դարում՝ վկայակոչելով Ռամիլ Սաֆարովի կողմից Գուրգեն Մարգարյանի կացնահարումը:
ԱԺ նախագահի խոսքով՝ այսօր Ադրբեջանի իշխանությունը միևնույն ձեռագիրն է որդեգրել Ադրբեջանի տարածքում բնակվող այլ էթնիկ փոքրամասնությունների նկատմամբ. «Ես ուզում եմ զգուշացնել միջազգային հանրությանը, որ Ադրբեջանում ապրող ժողովուրդները գրեթե կանգնած են միևնույն վտանգի առջև, ինչ հայերը՝ նախորդ դարի վերջին: Կարևորում եմ միջազգային հանրության և գործընկեր խորհրդարանների կողմից տեղի ունեցած հանցագործություններին ճիշտ գնահատական տալը»:
Նա ընդգծեց՝ Բաքվի, Սումգայիթի, Կիրովաբադի ջարդերը անհնար են դարձնում Արցախի ֆիզիկական գոյությունը Ադրբեջանի սուվերենության ներքո. «Արցախի հայության գոյության միակ հնարավոր ճանապարհը Արցախի ինքնորոշումն է, և ՀՀ-ն արցախցիների այդ իրավունքի իրացման երաշխավորն է»:
Մանրամասները՝ տեսանյութում:
