ՌԴ նախագահ Վլադիմիր Պուտինի ամենամյա ուղերձից հետո Ռուսաստանի կառավարությունը հրաժարական է տվել, և Պուտինը բարձրացրել է Սահմանադրության փոփոխության, կառավարման կիսանախագահական համակարգին անցնելու հարցեր: Ռուսաստանի նոր վարչապետը հարկային ծառայության ղեկավար նախկին Միխայիլ Միշուստինն է, իսկ արդեն նախկին վարչապետ Դմիտրի Մեդվեդևն էլ կզբաղեցնի Անվտանգության խորհրդի նախագահի տեղակալի պաշտոնը: Ռուսական փոփոխություններն առաջ են բերում հարցեր, որոնք հետաքրքիր են, բնականաբար, նաև Հայաստանի համար: Թեմայի շուրջ զրուցելու համար «Առաջին լրատվական»-ը հյուրընկալել է միջազգայնագետ Կարեն Վերանյանին և ռազմական փորձագետ Լեոնիդ Ներսիսյանին:
Լեոնիդ Ներսիսյանը Ռուսաստանում այս փոփոխությունները համարում է Պուտինի ղեկավարության տրանզիտի ինչ-որ մաս: «Իմ կարծիքով՝ հաջորդ ժամկետում Վլադիմիր Պուտինը չի ուզում այլևս նախագահ լինել, բայց կարող է զբաղեցնել մեկ այլ պաշտոն, ասենք՝ Պետխորհրդի նախագահ, որը ավելի քիչ կզբաղվի ներքին խնդիրներով և ավելի շատ կարող է զբաղվել արտաքին հարցերով: Այսինքն՝ նա ուզում է գնալ, բայց ոչ մինչև վերջ, ինչպես Նազարբաևը»,- ասաց նա՝ հավելելով, որ հազիվ թե հայկական սցենարը կրկնվի Ռուսաստանում:
Մեր զրուցակիցը կարծում է, որ Մեդվեդևի հեռանալը կբարձրացնի Պուտինի վարկանիշը. «Դա այն «կոզրներից» մեկն էր, որ մի օր Պուտինը պետք է օգտագործեր»:
Կարեն Վերանյանն էլ այս ամենը բացատրում է Ռուսաստանում սոցիալ-տնտեսական և ներքաղաքական դժգոհություններով. «Սրանով Պուտինը փորձում է ժամանակին համահունչ, ադեկվատ քայլեր ձեռնարկել»:
Նրա կարծիքով՝ Ռուսաստանը հիմա գտնվում է մի փուլում, որը հեռու է այն տրամաբանությունից, որ Պուտինը կարող է իշխանությունը մասնակիորեն փոխանցել իր վերահսկողության դաշտից դուրս ինչ-որ ուժերի կամ ինչ-որ անձի, քանի որ իշխանության նման փոխանցումը Ռուսաստանը կկանգնեցնի կրախի առաջ. «Արևմուտքն էլ կօգտվի այդ իրավիճակից, և խժդժությունները շատ ավելի ցանցային և խորքային նշանակություն կունենան, քան հիմա: Այս փուլում, կարծում եմ, Պուտինը կբավարարվի նման փոփոխություններով»:
Հարցազրույցն ամբողջությամբ՝ տեսանյութում: