Սահմանադրական բարեփոխումների մասնագիտական հանձնաժողովի անդամների թեկնածության հայտեր ներկայացնելու վերաբերյալ օրերս հայտարարություն է հրապարակել Արդարադատության նախարարությունը: Ստեղծվելիք հանձնաժողովի կազմում ՀՀ դատական և իրավական բարեփոխումների 2019-2023թթ. ռազմավարությանը համապատասխան մրցութային ընթացակարգով ընդգրկվելու են 6 իրավաբան-գիտնական և հասարակական կազմակերպությունների 2 ներկայացուցիչ: Վերջիններիս ներկայացվող պահանջները նախատեսված են նշված որոշմամբ:
Թեմայի շուրջ «Առաջին լրատվական»-ը զրուցեց «Քաղաքացու որոշում» սոցիալ-դեմոկրատական կուսակցության ներկայացուցիչ Նարեկ Ներսիսյան, «Սասնա ծռեր» կուսակցության ներկայացուցիչ Արայիկ Պապիկյանի և «Լուսավոր Հայաստան» կուսակցության ներկայացուցիչ Գրիգորի Դոխոյանի հետ:
Անդրադառնալով Սահմանադրական բարեփոխումների մասնագիտական հանձնաժողովի ձևավորման ընթացակարգին՝ Նարեկ Ներսիսյանը նշեց. «Սահմանադրությունը ՀՀ քաղաքացուն է վերաբերում, և ՀՀ քաղաքացին պետք է որոշի՝ ինչ արժեքներ կրող պետություն է ուզում, և բոլոր քաղաքացիների միջև պայմանավորվածությունը պետք է լինի: Հանձնաժողովում 6 իրավաբան գիտնականների և ՀԿ 2 ներկայացուցիչների ներգրավվածությունը բավարար չէ: Իրավաբանները չեն կարող ներկայացնել հանրության լայն շրջանակները, նրանք մասնագետներ են, որոնք կարող են ձևակերպումներ տալ և միջազգային իրավունքից մեջբերումներ անել, բայց ՀԿ 2 ներկայացուցիչը և 6 իրավաբանը չեն կարող իրենցով սահմանափակել ՀՀ նոր Սահմանադրությունը…»:
Սահմանադրական բարեփոխումների հարցը, թերևս, Հայաստանի առջև ծառացած ամենակարևոր հարցերից է: Անդրադառնալով այս դիտարկմանը՝ Արայիկ Պապիկյանը նշեց, որ անհրաժեշտություն կա ոչ թե սահմանադրական բարեփոխումներ իրականացնել, այլ նոր Սահմանադրություն ընդունել. «Հնարավոր չէ և անթույլատրելի է, որ լեգիտիմությունից զուրկ փաստաթուղթը, որը փաթաթվել է ՀՀ-ի և ՀՀ քաղաքացիների վզին, բարեփոխել. դրանով կլեգիտիմացնենք ապօրինի Սահմանադրությունը»: Արայիկ Պապիկյանի դիտարկմամբ՝ Սահմանադրական բարեփոխումների մասնագիտական հանձնաժողովը ներառական չէ. «Բացի իրավաբան-գիտնականներից և ՀԿ անդամներից, նախատեսված է, որ հանձնաժողովում ընդգրկվեն նաև խորհրդարանական քաղաքական ուժերի ներկայացուցիչներ, բայց այս դեպքում արտախորհրդարանական բոլոր ուժերը դուրս են մնում»:
«Ի վերջո շանս ունենք չկեղծել սահմանադրական հանրաքվեն,- ընդգծեց Գրիգորի Դոխոյանը՝ հավելելով, որ կարևոր է խորհրդարանական երկրին անցումը:
Մանրամասն՝ տեսանյութում: