Ինչպես գիտեք՝ վարչապետ Նիկոլ Փաշինյանը երեկ որպես վկա և տուժող հարցաքննության է կանչվել ԱԱԾ- տնօրեն – ՀՔԾ պետ և ԱԱԾ տնօրեն – վարչապետ հեռախոսազրույցների գաղտնալսումների հայտնի գործով: Այդ գաղտնալսումներից մեկը հրապարակվեց Երևանի քաղաքապետի արտահերթ ընտրությունների, մյուսը՝ խորհրդարանի արտահերթ ընտրությունների ժամանակ: ԱԱԾ նախկին տնօրենը հայտարարեց, որ հայտնի է գաղտնալսումների պատվիրատուն, որը, ըստ նրա, հանրությանը հայտնի անձ է, սակայն Արթուր Վանեցյանն անուն չնշեց՝ ասելով, որ բավարար չեն ապացույցները: Արդյո՞ք քննությունն այս ընթացքում առաջ է գնացել ապացույցների ձեռքբերման առումով:
Թեմայի շուրջ «Առաջին լրատվական»-ի հետ քննարկմանը մասնակցեցին տեղեկատվական անվտանգության փորձագետ Արմեն Մարտիրոսյանը, քաղաքագետ Արմեն Վարդանյանը և ԱԺ «Իմ քայլը» խմբակցության պատգամավոր Գայանե Աբրահամյանը:
«Մենք ապրում ենք մի երկրում, որտեղ գաղտնալսումներ անելու հնարավորություն ունեցողների թիվը մեկից ավելի է, ինչը շատ վատ է,- նշեց Սամվել Մարտիրոսյանը:- Ըստ օրենքի՝ այդպիսի հնարավորություն ունի ԱԱԾ-ն, և ոստիկանությունը կարող է դիմել ԱԱԾ-ին և ստանալ գաղտնալսումը: Մի յուրահատուկ իրավիճակում ենք ապրում՝ տեխնիկական փոփոխություններ կան ամբողջ աշխարհում, և յուրաքանչյուր հարուստ մարդ կարող է ունենալ գաղտնալսման հնարավորություն: Կան շատ դերակատարներ, օրինակ՝ նկատի ունենալով վերջին երկու-երեք ամիսների հարձակումները քաղհասարակության, լրագրողների դեմ, էլ չեմ խոսում քաղաքական գործիչների դեմ հարձակումների մասին, կարող ենք հետքերը մոտավորապես պատկերացնել: Կա կասկած, որ ինչ-որ դեպքերում ԱԱԾ-ն է գործում, որոշ դեպքերում ԱԱԾ-ի նախկին կամ ներկա աշխատակիցներն են ինչ-որ զուգահեռ գործունեություն ծավալում, կա նաև կասկած, որ խոշոր կորպորացիաներն են վարձում հակերներ, և կան կասկածներ, որ օլիգարխիկ խմբերն են վարձում հակերներ: Էլ չեմ խոսում արտաքին ակտիվացումների մասին, մեր դեմ աշխատում են մեր ոխերիմ հարևաններն ու բարեկամները, նաև այլ երկրների հատուկ ծառայություններ կան, որոնք մեր երկրով հետաքրքրված են»:
Գայանե Աբրահամյանի դիտարկմամբ՝ Հայաստանի դեմ հիբրիդային պատերազմ է տարվում, և մեծ վտանգներ կան, քանի որ ներքաղաքական որոշ դերակատարների ներգրավվածություն կա: Պատգամավորի խոսքով՝ ԱԱԾ-ն արմատապես պետք է փոփոխվի, քանի որ ինֆորմացիայի արտահոսք է տեղի ունենում:
Արմեն Վարդանյանի դիտարկմամբ՝ Հայաստանի իշխանության դեմ խաղում են բազմաթիվ խաղացողներ՝ և՛ ներքին, և՛ արտաքին. «Հայաստանի դեմ բազմավեկտոր հիբրիդային պատերազմ է տարվում»:
Քննարկման մասնակիցների կարծիքով՝ կեղծ լուրը ազգային անվտանգության խնդիր է:
Մանրամասն՝ տեսանյութում: