Եվրամիությունը հրաժարվում է մեկնաբանել Իրանի արտաքին գործերի նախարար Մոհամադ Ջավադ Զարիֆի այն հայտարարությունը, որ Մեծ Բրիտանիան, Ֆրանսիան և Գերմանիան իրանական միջուկային գործարքի (Գործողությունների համատեղ համապարփակ ծրագիր, ԳՀՀԾ) «մնացորդները ծախեցին» եվրոպական ավտոմոբիլների վրա մաքսատուրքեր չսահմանելու ԱՄՆ-ի նախագահ Դոնալդ Թրամփի խոստման դիմաց՝ տեղեկացնում է TASS-ը:
«Ինչ վերաբերում է «եվրաեռյակի» վերաբերյալ նախարար Զարիֆի դիտողությանը, ապա մենք չենք մեկնաբանում… Մենք աշխատում ենք պահպանել գործարքը, որովհետև այն շատ կարևոր է»,-հունվարի 16-ին Բրյուսելում կայացած մամուլի ասուլիսում հայտարարել է ԵՄ-ի արտաքին քաղաքական ծառայության ներկայացուցիչ Պետեր Ստանոն:
Ավելի վաղ Զարիֆը հայտարարել է, որ Լոնդոնը, Փարիզը և Բեռլինը իրանական միջուկային գործարքի «մնացորդները ծախեցին» եվրոպական ավտոմոբիլների վրա մաքսատուրքեր չսահմանելու ԱՄՆ-ի նախագահ Դոնալդ Թրամփի խոստման դիմաց: ԱԳ նախարարն այսպես է մեկնաբանել The Washington Post թերթի համապատասխան հրապարակումը: «Եվրաեռյակը» ԳՀՀԾ-ի մնացորդները ծախեց Թրամփի նոր մաքսատուրքերից խուսափելու դիմաց:
Այդպես չի լինի, բարեկամնե՛ր: Դուք միայն գրգռում եք նրա ախորժակը «…» Եթե դուք ցանկանում եք վաճառել ձեր ազնվությունը, ուրեմն՝ առաջ: Բայց բարձր բարոյականության և իրավաբանական հիմնավորումների մասին մի խոսեք, դուք դրանք չունեք»,-գրել է Զարիֆը Twitter-ի իր Էջում: