Կառավարությունում քննարկվել է սոցիալական աջակցության նոր հայեցակարգը: Կառավարության առաջարկած գաղափարական տրանսֆորմացիան հետևյալն է. «Մենք ուզում ենք, որ համակարգը մարդուն օգնի հաղթահարել աղքատությունը»: Թեմայի շուրջ զրուցելու համար «Առաջին լրատվական»-ը հյուրընկալել է մշակութային մարդաբան Աղասի Թադևոսյանին:
«Նպաստների քաղաքականության միջոցով ոչ թե կրճատվում է աղքատությունը, այլ աղքատության գրանցման ցուցիչները»,- նշեց մեր զրուցակիցը՝ հավելելով, որ նպաստի միջոցով կարելի է թվերի հետ խաղալ՝ իբր աղքատությունը հաղթահարելու համար:
Աղասի Թադևոսյանն ընդգծեց՝ աղքատությունը չի հաղթահարվել. «Հիմա մենք խնդիր ունենք աղքատության ցուցանիշների հաղթահարման այդ կեղծ, մանիպուլյատիվ քաղաքականությունից անցնելու իրականում աղքատության հաղթահարման, և այս առումով շատ կարևոր է, որ նոր կառավարությունը արդեն ըստ էության է մոտենում խնդրին և մոտեցումն է փոխում»:
Նա հույս հայտնեց, որ առաջիկայում կլինի պետական այնպիսի քաղաքականություն, որը համալիր մոտեցում կցուցաբերի մարդու աղքատության գնահատման և այդ աղքատությունից դուրս գալու աջակցության նկատմամբ. «Եվ դա չի լինի միայն սոցիալական նպաստի քաղաքականություն, այլ կլինի վերականգնողական քաղաքականություն, որովհետև աղքատ մարդիկ, այպես ասած, վերականգնվելու խնդիր ունեն, քանի որ նրանց աղքատությունն առաջանում է ոչ միայն ֆինանսական պակասի, այլև հնարավորությունների հետևանքով»:
Հարցազրույցն ամբողջությամբ՝ տեսանյութում: