Վարչապետ Նիկոլ Փաշինյանի և նրա ընտանիքի դեմ քարոզչական հարձակումների մասին հրապարակումները նորից օրակարգ բերեցին մանիպուլյացիաների, կեղծ լուրերի տարածման, ազգային անվտանգության խնդիրը: Այստեղ խնդիրը ոչ միայն վարչապետի ընտանիքին թիրախավորելն է, այլ ամբողջ Հայաստանի անվտանգության հարցն է: Մեդիափորձագետները հավաստում են, որ կա նոր միտում՝ կիբերհարձակումները ոչ միայն դրսից են, ինչպես նախկինում՝ Ադրբեջանից, այլ նաև ունեն ներքաղաքական բնույթ:
Թեմայի շուրջ «Առաջին լրատվական»-ի հետ զրույցում գրող Արմեն Հայաստանցին ընդգծեց. «Մեծ ողբերգություն տեղի չի ունեցել, դա փոքրիկ ողբերգությունների շարքից է: Ամենացավալին այն է, որ սլաքներն ուղղվում են մեր նախկին ԱԱԾ ղեկավարին, չնայած մենք Դավիթ Շահնազարյան էլ ենք տեսել, այսինքն՝ այնպես չէ, որ մեր ԱԱԾ-ն ղեկավարել են, մեղմ ասած, փայլուն մասնագետներ: Ինձ համար ամենացավալին դա էր, մնացածն օրինաչափ է: Այսինքն՝ մեդիափորձագետները ճիշտ են նկատել, որ կա նման խնդիր, բայց դրանից մեծ պատմություն դարձնել, որ վայ-վայ, տեսեք՝ ազգը կործանվում է, պետք չէ: Իհարկե պետք է ինչ-որ քայլեր ձեռնարկել: Գիտեմ, որ ԱԺ-ում հիմա փորձում են օրենքի նախագիծ մշակել, բայց դրան կողմ չեմ, որովհետև կարծում եմ, որ մարդկանց բերանները փակելով՝ խնդիրները չեն լուծվում»:
Ինչու է դաշտը լցվում ապատեղեկատվությամբ: Գրողի դիտարկմամբ՝ կա մեդիայի պատասխանատվության հարց: «Հայաստանի մեդիադաշտում այնպիսի իրավիճակ է, որ մեդիայի հսկայական մասը հայտնի է, թե ինչ խմբի մարդկանց է պատկանում, նրանք ունեն քաղաքական իրենց օրակարգը և կեղտոտ մեթոդներով են առաջ գնում»,- նշեց Արմեն Հայաստանցին՝ հավելելով, որ մյուս կողմը պետք է մեդիադաշտը լցնի աշխատանքով, ճիշտ տեղեկատվությամբ, և կեղծ լուրերը չպետք է տարածվեն: Նրա խոսքով՝ կան մեդիայի վերաբերյալ օրենքներ, և այդ օրենքներով առաջնորդվելու դեպքում ինչ-որ հարցեր կլուծվեն: «Սակայն կա դատական բաց, եթե անգամ շատ լավ օրենքներ ընդունենք, դեռ մեծ հարց է, այս դատարանները այդ օրենքներով ճիշտ որոշումներ կկայացնե՞ն, թե՞ ոչ»,- նկատեց գրողը:
Մանրամասն՝ տեսանյութում: