Հոկտեմբերի 27-ի ոճրագործության զոհ Յուրի Բախշյանի այրին՝ Անահիտ Բախշյանը, նամակով դիմել է ՀՀ վարչապետ Նիկոլ Փաշինյանին, ՀՀ ԱԺ նախագահ Արարատ Միրզոյանին և ՀՀ գլխավոր դատախազ Արթուր Դավթյանին։ Տիկին Բախշյանն առաջարկում է, որ Հոկտեմբերի 27-ի գործի վերաբացումից հետո քննող մարմինը տուժողի իրավահաջորդ հայտարարի Հայաստանի Հանրապետությանը՝ ի դեմս ՀՀ Ազգային ժողովի և ՀՀ կառավարության: «Պետության իրավունքների պաշտպանությունը կդրվեն տուժողի իրավահաջորդ ՀՀ ԱԺ-ի՝ ի դեմս ԱԺ նախագահի, և ՀՀ կառավարության՝ ի դեմս ՀՀ վարչապետի վրա։ Գործի արդյունավետության համար պատասխանատվություն կկրեն հենց իրենք՝ առանց միջամտելու քննչական խմբի գործողություններին»,- գրել է նա։
Վերաբացված գործը, ըստ Բախշյանի, պետք է հանձնարարել այդ նպատակով ստեղծված հատուկ քննչական այն խմբին, որի մեջ կներառվեն ՀՀ-ում առկա ամենապրոֆեսիոնալ քննիչներ (ներառյալ ԱԱԾ քննիչներ), որոնք ունեն անբասիր աշխատանքային կենսագրություն և բարձրագույն ակնածանք իրենց ուսադիրի նկատմամբ։ Անահիտ Բախշյանը ակնկալում է գրավոր կամ հրապարակային պատասխան իր ներկայացրած առաջարկությունների շուրջ։
Հոկտեմբերի 27-ի ոճրագործության զոհ Արմենակ Արմենակյանի այրին՝ Արմինե Արմենակյանը, «Առաջին լրատվական»-ի հետ զրույցում ասաց, որ տիկին Բախշյանի նախաձեռնությանը միանշանակ աջակցում է. «Նա մեր բոլորի անունից է դիմել, որ գործը վերաբացվի։ Հոկտեմբերի 27-ի գործն անպայման պետք է բացահայտվի, ու դրա համար անհրաժեշտ է նոր քննություն անցկացնել»։
Արմինե Արմենակյանը նաև դրական կարծիք ունի տիկին Բախշյանի մյուս նախաձեռնության շուրջ, որով գործի վերաբացումից հետո Հայաստանի Հանրապետությունը՝ ի դեմս կառավարության, և Ազգային ժողովը պետք է ճանաչվեն տուժող. «Լավ է, որ Հայաստանի Հանրապետությունը՝ ի դեմս կառավարության ու վարչապետի, որպես տուժող ճանաչվի, մենք միանշանակ աջակցում ենք այդ հարցում տիկին Անահիտ Բախշյանին»։
Հոկտեմբերի 27-ի գործով տուժողի ներկայացուցիչ Լյովա Եղիազարյանը համոզված է՝ Անահիտ Բախշյանն իր ձգտումներում ազնիվ է։ Քաղաքական տեսանկյունից տիկին Բախշյանի պահանջը, ըստ մեր զրուցակցի, միանգամայն հասկանալի է։ Միևնույն ժամանակ Լյովա Եղիազարյանն ասաց, որ իրավական տեսանկյունից չի պատկերացնում, թե ինչպես է դա հնարավոր: «Հոկտեմբերի 27-ի ժամանակ այսօրվա վարչապետը լրագրող է եղել, Արարատ Միրզոյանը՝ շարքային ուսանող, չեմ պատկերացնում՝ նրանք ինչպես կարող են տուժող ճանաչվել։ Ես հասկանում եմ, որ տիկին Բախշյանը որպես տուժող ուզում է ավելի խստացնել հարցը, բայց ես այդպիսի նախադեպ չեմ հիշում համաշխարհային պատմության մեջ»,- «Առաջին լրատվական»-ի հետ զրույցում ասաց նա։
Մեր զրուցակցի դիտարկմամբ՝ բարդ է ասել՝ արդյոք դա իրավական որևէ արդյունք կտա՞: «Ես հասկանում եմ՝ նա ցանկանում է, որ պատասխանատվությունը ոչ միայն տուժողներինը լինի, այլև պետությունը դառնա տուժողների երաշխավորը՝ դրա հետ լիովին համաձայն եմ։ Պետությունը կարող է լինել քաղաքական երաշխավոր, բայց իրավական առումով պետությունը ճնշում կգործադրի, կարող է այդպես դիտարկվել։ Լրիվ ազնիվ են Անահիտ Բախշյանի ձգտումները, բայց կրկնում եմ՝ այդպիսի նախադեպ չեմ հիշում։ Այո՛, դա պետության դեմ մեծ հանցագործություն էր, այն ժամանակ պետությունը ներկայացնում էր Ռոբերտ Քոչարյանը։ Նա որևէ պատասխանատվություն չի կրել դրա համար, հիմա կա ժողովրդի շահերը ներկայացնող կառավարություն, բայց արդյոք Նիկոլ Փաշինյանը իրավական տեսանկյունից կարո՞ղ է լինել տուժող»,- եզրափակեց Լյովա Եղիազարյանը։
Լուսանկարը՝ Photolure-ի
