Նիկոլ Փաշինյանի կառավարությունը սկսել է իրագործել կոռուպցիայի դեմ պայքարի, տնտեսական և արդարադատության ոլորտներում բարեփոխումներ։ Այս մասին ասվում է Human Rights Watch իրավապաշտպան կազմակերպության 2019 թվականի զեկույցում:
Զեկույցը անդրադարձել է նաև 2018-ի դեկտեմբերին Հայաստանում կայացած խորհրդարանական ընտրություններին, որոնք միջազգային դիտորդների գնահատմամբ, համապատասխանել են միջազգային չափանիշներին:
Միաժամանակ, զեկույցի հեղինակաները ընդգծում են մարդու իրավունքների պաշտպանության ոլորտում Հայաստանում առկա խնդիրների և թերությունների մասին, մասնավորապես, նախկինում կատարված բռնությունների և իրավապահների կողմից անհամաչափ ուժի կիրառման դեպքերի կապակցությամբ պատշաճ հետաքննությունների բացակայությունը:
Զեկույցում նշվում է, որ ոստիկանությունը ցույցերի ժամանակ շարունակում է բռնություն կիրառել նաև իշխանափոխությունից հետո: Մասնավորապես, Ամուլսարի հանքի շահագործման դեմ նախորդ տարի տեղի են ունեցել մի քանի ցույցեր, որոնցից մեկը՝ ՀՀ կառավարության դիմաց, որի ընթացում ոստիկանները բերման են ենթարկել մի քանի ակտիվիստների:
Human Rights Watch-ը չի շրջանցել նաև Ստամբուլյան կոնվենցիայի շուրջ Հայաստանում քննարկվող բանավեճը` նշելով, որ դրա ընթացքում հաճախ կիրառվել է ատելության խոսք: Ըստ զեկույցի, շարունակվում են նաև սեռական կողմնորոշման և գենդերային ինքնության հիման վրա բռնության և խտրականության, հաշմանդամություն ունեցող անձանց նկատմամբ խտրականության և մեկուսացման, ինչպես նաև ընտանեկան բռնության դրսևորումները: «2019 թվականի առաջին կեսին Հայաստանի ոստիկանությունը ընտանեկան բռնության վերաբերյալ 331 քրգործ է հետաքննել, որից 209-ին պաշտոնական մեղադրանք է առաջադրվել, իսկ դատարան է հասել ընդամենը 45-ը», – ասվում է զեկույցում: