«Ժամանակակից քաղաքական պայքարը առանց հիբրիդային կամ տեղեկատվական պատերազմների չի լինում: Եվ քանի որ Արթուր Վանեցյանը հայտարարել է, որ ինքն այսուհետ զբաղվում է քաղաքականությամբ, նշանակում է նաև, որ ինքը տեղեկատվական պատերազմներ է վարելու իր քաղաքական հակառակորդների դեմ՝ ի դեմս իշխանությունների»,- «Առաջին լրատվական»-ի հետ զրույցում նշեց Երևանի մամուլի ակումբի նախագահ Բորիս Նավասարդյանը:
Մեր զրուցակցին զարմանալի է թվում այս միջադեպը այդպես սկանդալային կերպով ներկայացնելը. «Այլ բան է, եթե իշխանությունները տիրապետում են որևէ տվյալների, որ այդ գործունեությունը նաև հակաօրինական միջոցներով է իրականացվում: Այդ դեպքում պետք է համապատասխան օպերատիվ գործողություններ իրականացվեն, այլ ոչ թե տեղեկատվական ոլորտում այդ կարգի զանգվածային պատասխան հնչեցվի, ինչը կարող է նշանակել, որ Արթուր Վանեցյանին ընկալում են որպես լուրջ հակառակորդ, իսկ դա ինձ համար զարմանալի է»:
Բորիս Նավասարդյանի կարծիքով՝ մերժվածներին կարելի է բաժանել երկու հիմնական ճամբարների. «Մեկը այն ճամբարն է, որ համարում է, թե մերժված լինելով՝ կարելի է նույն դեմքով մտնել քաղաքականություն և ինչ-որ բանի հավակնել, ինչը ես անլուրջ եմ համարում: Բայց կան նաև գործիչներ, որոնք մնում են ստվերում և փորձում են նոր դեմքերի կամ կառույցների միջոցով հանդես գալ որպես ընդդիմություն: Եվ պարզ է, որ այդ կարգի նոր դեմքերից մեկը կարող է լինել նաև Արթուր Վանեցյանը: Սա կարելի էր շատ լուրջ մարտահրավեր ընկալել, եթե այդքան արագ չբացահայտվեին (եթե, իհարկե, բացահայտվել են) կապերը մերժվածների հետ: Իսկ ինձ համար ակնհայտ է, որ տեսանելի ապագայում որևէ կապ մերժվածների կամ նախորդների հետ նշանակում է, որ այդ քաղաքական ուժը կամ քաղաքական ճամբարը որևէ հեռանկար չի կարող ունենալ»:
ԵՄԱ նախագահի խոսքով՝ իսկ հեղաշրջումը միայն արտաքին աջակցությամբ կարող է լինել. «Բայց այն արտաքին ուժը, որը կարող էր նպաստել հեղաշրջմանը, կարծես ընդհանուր լեզու գտել է նոր իշխանությունների հետ: Այնպես որ՝ իշխանությունները կարող են շատ չմտահոգվել և զբաղվել ավելի լուրջ հարցերով, որոնք շատ են»:
Հարցազրույցն առավել մանրամասն՝ տեսանյութում: