Երևանի ընդհանուր իրավասության դատարանն այսօր հետաձգել է Ռոբերտ Քոչարյանի և մյուս նախկին պաշտոնյաների գործով այսօրվա դատական նիստը: Նիստին չէր ներկայացել մեղադրյալներից ՀԱՊԿ նախկին գլխավոր քարտուղար Յուրի Խաչատուրովի պաշտպան Միհրան Պողոսյանը, ով բոյկոտել էր այսօրվա դատական նիստը: Դատական նիստը նախագահող դատավոր Աննա Դանիբեկյանը հայտարարել է, որ ստացել է Միհրան Պողոսյանի դիմումը, որտեղ պաշտպանը նշել է, որ չի կարող ներկայանալ նիստին, քանի որ համարում է, որ սույն գործի ընթացքում դատարանը չի ապահովում մրցակցության սկզբունքը։
Միաժամանակ դատավոր Աննա Դանիբեկյանը Յուրի Խաչատուրովին զգուշացրել է, որ եթե պաշտպանը երեք անգամ նիստին չներկայանա, պետք է այլ պաշտպան ներգրավել այս գործում:
Թեմայի շուրջ «Առաջին լրատվական»-ի հետ քննարկմանը մասնակցեցին Գերագույն խորհրդի նախկին պատգամավոր Ազատ Արշակյանը, «Անտարես» հրատարակչության տնօրեն Արմեն Մարտիրոսյանը և Պահպանողական կուսակցության նախագահ Միքայել Հայրապետյանը:
Քննարկման մասնակիցների դիտարկմամբ՝ Մարտի 1-ի գործով դատաքննության ձգձգումը քաղաքական նպատակ է հետապնդում:
Միքայել Հայրապետյանի դիտարկմամբ՝ ձգձգման քաղաքականություն է վարվում. «Մարդիկ քաղաքական խնդիր են լուծում, ձգձգելու քաղաքականությունն այդ տրամաբանության մեջ է. «կա՛մ էշը կսատկի, կա՛մ իշատերը»: Միքայել Հայրապետյանի խոսքով՝ եթե հանկարծ փոփոխություն լինի, մեղադրվողների խումբը շահեկան վիճակում կհայտնվի:
Արմեն Մարտիրոսյանի խոսքով՝ որքան էլ փաստաբաններն օգտվեն դատական պրոցեսը ձգձգելու հնարավորությունից, այսպես թե այնպես, կգա մի պահ, երբ դատավորը կանցնի սանկցիաների:
Մանրամասն՝ տեսանյութում:
