Լուրեր
Փորձում են թաքնվել անձեռնմխելիության հետևում. ՍԴ հարցը դարձրել են «բոլոլա»

Այսօր մամուլում հրապարակվեց տեղեկություն այն մասին, որ Սահմանադրական դատարանի նախագահ Հրայր Թովմասյանը հրավիրվել է ՀՔԾ: «Առաջին լրատվական»-ի հետ զրույցում Աժ Պետաիրավական հարցերի մշտական հանձնաժողովի նախագահ Վլադիմիր Վարդանյանն անդրադառնալով այս դիտարկմանը՝ նշեց, որ այսօր տեղի է ունեցել ԱԺ Պետաիրավական հանձնաժողովի նիստ, և չի հասցրել տեղեկանալ մամուլի հրապարակումների մասին: «Միակ բանը, որ կարող եմ նշել, հետևյալն է՝ բոլոր կողմերը պետք է հարգեն Սահմանադրական դատարանի մասին այն դրույթը, որ բոլոր քննչական գործողությունները, որ կարող են կատարվել ՍԴ դատավորի նկատմամբ, պետք է հնարավորինս այնպես իրականացնել, որ չտուժի ՍԴ-ի և դատական իշխանության հեղինակությունը: Պետք է խնայենք դատական իշխանությանը»:

Վլադիմիր Վարդանյանի գնահատմամբ՝ Սահմանադրական դատարանի շուրջ առկա է ճգնաժամ: «Իրավիճակը բարդ է, բնականոն հունով չեն ընթանում սահմանադրական գործընթացները: Կարծում եմ՝ սա ՍԴ ներսում առկա ներքին խնդիր է, ճգնաժամի երկու նժարներին ՍԴ դատավորներն են»,- նշեց Վ. Վարդանյանը՝ հավելելով, որ առկա խնդրի լուծմամբ առաջին հերթին պետք է շահագրգռված լինեն ՍԴ դատավորները:

Քրեական գործ է հարուցվել արդարադատության նախկին նախարար Հրայր Թովմասյանի նկատմամբ, և նա հրավիրվել է ՀՔԾ, այժմ նա որպես ՍԴ նախագահ փորձում է օգտվել անձեռնմխելիության նորմից: Վլադիմիր Վարդանյանի խոսքով՝ անձեռնմխելիության հաղթահարումը ընթացակարգային նորմ է, և գործող Սահմանադրությամբ նախատեսվում է գործառութային անձեռնմխելիություն: «Տվյալ պարագայում արարքը ենթադրաբար (անմեղության կանխավարկածը պահպանենք) կատարվել է մինչև անձեռնմխելիության կարգավիճակ ստանալը… Ինչո՞ւ են փորձում թաքնվել անձեռնմխելիության հետևում: Այս հարցը բարդացնելը, «բոլոլա» դարձնելն անհասկանալի է»:

Մանրամասն՝ տեսանյութում:

  • Դիտումներ՝ *