Աշխատանքային շաբաթը մեկնարկել է «Հայկական ժամանակ» օրաթերթի սկանդալային հոդվածի շուրջ քննարկումներով։ Օրակարգում կրկին, մեծ հաշվով, վարչապետի և ԱԱԾ նախկին տնօրենի քաղաքական հարաբերություններն են։ Պարզվում է՝ նախկինում վարչապետի և ԱԱԾ տնօրենի ընտանիքները եղել են անմիջական շփումների մեջ։ Հիմա ԱԱԾ տնօրենի անունը կապվում է վարչապետի ընտանիքի անդամների դեմ հակաքարոզչության կազմակերպման հետ։ Անկեղծ ասած, թեման արժանի էր անտեսման, եթե չլիներ այս ամենի թիկունքում թաքնվող հակահեղափոխության ուրվականը:
Թեմայի շուրջ «Առաջին լրատվական»-ի հետ քննարկմանը մասնակցեցին «Իմ քայլը» խմբակցության պատգամավոր Արթուր Հովհաննիսյանը, «Քաղաքացու որոշում» կուսակցության անդամ Հայկ Սահակյանը և իրավապաշտպան Արթուր Սաքունցը:
«Խնդիրը հետևյալն է՝ ինչ դեր է ունեցել ԱԱԾ-ն Հայաստանի համար Հայաստանի Հանրապետության պատմության մեջ և ինչ դեր պետք է ունենա թավշյա հեղափոխությունից հետո ժողովրդավարական և իրավական պետության հռչակման մասին հայտ ներկայացրած իշխանության պայմաններում: Եվ երկրորդ՝ ինչպիսին պետք է լինեն այն քայլերը, որոնք պետք է ուղղված լինեն ԱԱԾ-ի գործունեության համապատասխանեցմանը ժողովրդավարական և իրավական պետության պահանջներին: Իմ կարծիքով՝ այս հարցերը պետք է հանրության ուշադրության կենտրոնում հայտնվեն»,- նշեց Արթուր Սաքունցը՝ հավելելով, որ ԱԱԾ-ն նախկինում եղել է պետության զավթման գործիքներից, և այժմ համակարգային արմատական փոփոխություններն օրակարգային են:
«Այս ամենի հետևում երևում են հակահեղափոխության «ականջները»,- ընդգծեց Հայկ Սահակյանը:
Արթուր Հովհաննիսյանի խոսքով՝ ԱԱԾ տնօրենը պետք է նշանակվեր համակարգից և նշանակվել է Արթուր Վանեցյանը, բայց մարդիկ պետք է վերափոխվեն. «Պետական ապարատի բոլոր գերատեսչություններում կան մարդիկ, ովքեր մի շարք ծառայություններ են մատուցել նախկին իշխանություններին հիմնականում ընտրությունների ժամանակ… Այս պարագայում մենք պետք է հույս ունենանք և աշխատենք պետական ապարատի այդ աշխատակիցների հետ, որպեսզի նրանք վերափոխվեն»: Պատգամավորը նաև հավելեց, որ տեղեկատվական հարձակումներ են իրականացվում իշխանության և քաղհասարակության նկատմամբ. «Արթուր Վանեցյանը՝ իր թիմակիցներով, քաղաքական դաշտում գործունեության հայտ են ներկայացնում, և փորձում են տեղեկատվական որոշակի հոսքերի մանիպուլյացիների միջոցով հասարակության մոտ ինչ-որ կերպար ձևավորել»:
Արթուր Սաքունցը նկատեց, որ Արթուր Վանեցյանը քաղաքական հայտ ներկայացրել է պաշտոնը թողնելուց հետո իր հայտնի հայտարարությամբ: Իրավապաշտպանի խոսքով՝ մինչ այդ Վանեցյանին հայտնի դեմք էր դարձրել իշխանությունը: «Համակարգում պետք է գործեն մեխանիզմները, ոչ թե դոսյեները,- ընդգծեց իրավապաշտպանը՝ կարևորելով հաշվետվողականության մեխանիզմը:
Մանրամասն՝ տեսանյութում: