Յուրաքանչյուր սերունդ մտածում է, որ ինքն ավելի լավն է, քան նախորդ սերունդը, որ ինքն ավելի ուժեղ է և իր պոտենցիալն ավելին է, քան նախորդ սերնդինը: Դա բնական է, և հենց երիտասարդների այդ ամբիցիան է շարժիչ ուժը, որի շնորհիվ հեղափոխություն տեղի ունեցավ նաև մեր երկրում: Ի՞նչ են այսօր ուզում երիտասարդները: «Առաջին լրատվական»-ի հետ զրույցում, ի պատասխան այս դիտարկման և հարցի, երգիչ, երգահան Ռուբեն Հախվերդյանն ընդգծեց. «Արդարություն են ուզում: Եթե արդարություն չլինի, այլանդակ բաներ կկատարվեն…»:
Խոսելով չիրականացված սպասումներից՝ Ռուբեն Հախվերդյանը նշեց. «Ակնհայտ է, որ կան հանցագործներ, ժողովուրդը բողոքում է, թե ինչու են նրանց բռնում-բաց թողնում: Ըստ երևույթին՝ նրանց դատող դատավորներն էլ նույն համակարգից են, նույն կաշառակերները, սրիկաներն ու լափողներն են եղել, ո՞նց դատեն, եթե հանցակից են»: «Բարությանը պետք է պատասխանել բարությամբ, չարությանը՝ արդարությամբ»,- ընդգծեց Ռ. Հախվերդյան:
Պատասխանելով հարցին, թե վերջին շրջանում ի՞նչ փոխվեց մեր հասարակության մեջ, Ռ. Հախվերդյանը նշեց. «Այն ճորտին, որ կար մեր սերնդի, մեզնից առաջվա սերունդների մեջ, պետք է ամեն օր դուրս հանենք մեր միջից, որովհետև սովետական մտածողությունը դեռ շատերիս մոտ նստած է՝ ինչ կարելի է ասել, ինչ չի կարելի ասել կամ եթե ասեմ, օգտակար կլինի, թե վնասակար: Ես փորձում եմ ասել այն, ինչ մտածում եմ: Իմ հույսը երիտասարդերն են, նրանք Սովետի այլանդակությունները չեն տեսել: Իսկ ինձ համար դեռ շատ բան չի փոխվել, որովհետև հիմա էլ ինձ ուղիղ եթերների չեն հրավիրում հեռուստաընկերություններում»
Անդրադառնալով սոցցանցերում առկա ագրեսիայի դրսևորումներին, Ռ. Հախվերդյանը նշեց. «Գիտեմ, որ կան արվեստագետներ, որոնք ծախված են, մե՛կ սրա կողմից են խոսում, մե՛կ նրա: Ծիծաղելի է ազգային հերոս համարել Ռոբերտ Քոչարյանին: Մենք ունեցել են ազգային հերոս Գարեգին Նժդեհ, ունեցել ենք հերոսներ Լեոնիդ Ազգալդյան, Ռազմիկ Վասիլյան, Մոնթե Մելքոնյան, Թաթուլ, Ջիվան, Դև… Ռոբերտ Քոչարյանը ո՛չ պատերազմին մասնակցել է, ոչ էլ… նա ինչ հերոս:
Քոչարյանի աջակիցները խոսում են ռևանշիզմի մասին, ինչը, ըստ մեր զրուցակցի, «ռուսների ծրագիրն է»: «Իմ կարծիքով՝ Նիկոլը ռուսների դրած մարդը չէ»,- նշեց Ռ. Հախվերդյանը՝ ընդգծելով նաև, որ անհրաժեշտության կա վերանայել հայ-ռուսական պայմանագրերը:
Հարցազրույցն ամբողջությամբ՝ տեսանյութում: