Արժույթի միջազգային հիմնադրամի տվյալներով՝ 1 շնչին ընկնող ՀՆԱ-ով Հայաստանը 2019 թվականին առաջ է ընկել հարևան Վրաստանից։ Այս ցուցանիշների հետ համամիտ չեն թե՛ Վրաստանի ներկայիս էկոնոմիկայի նախարար Նաթիա Թուրնավան, թե՛ Վրաստանի նախկին նախագահ Միխեիլ Սաակաշվիլին։
Գնահատականի հետ համամիտ չի նաև Հայաստանի նախկին վարչապետ Հրանտ Բագրատյանը։ Ինչպիսի՞ն են ձեր դիտարկումները․ «Առաջին լրատվական»-ի հարցին ԱԺ «Իմ քայլը» խմբակցության պատգամավոր Գևորգ Պապոյանը պատասխանեց․ «Նախ նշեմ՝ Հրանտ Բագրատյանը նշել է, որ դրա պատճառը դրամի կուրսի արժևորումն է, բայց դրամի կուրսն արժևորվել է ընդամենը 0,52 տոկոսով և, ըստ էության, այն շատ աննշան ազդեցություն է ունեցել։ Հիմա մեթոդաբանության մասին։ Ինչի մասին է խոսքը։ Ես չգիտեմ, թե Վրաստանում ինչ մեթոդաբանությամբ են հաշվարկել, բայց Արժույթի միջազգային հիմնադրամը, Համաշխարհային բանկը, և ընդհանրապես բոլոր համաշխարհային տնտեսագիտության դասագրքերում կա ՀՆԱ-ի հաշվարկման մի մեթոդաբանություն։ Ավելին ասեմ, օրինակ՝ Վրաստանում զբոսաշրջությունն հաշվում են այլ մեթոդաբանությամբ։ Եթե որևէ մեկն այցելում է Վրաստան, նրանք համարում են, որ նա զբոսաշրջիկ է։ Իսկ մեր մոտ զբոսաշրջիկ ենք համարում այն մարդուն, որը գոնե մեկ օր գիշերել է Հայաստանում։ Մեր այդ մեթեդաբանությունը համընկնում է համաշխարհային զբոսաշրջությանը»։
Իսկ ԱԺ «Բարգավաճ Հայաստան» խմբակցության պատգամավոր Սերգեյ Բագրատյանն էլ ասաց․ «Ընդհանրապես, ցանկացած հաշվարկ նպատակին ծառայելու իմաստ պետք է ունենա։ Տպավորություն կա, որ եթե մենք նման թվաբանություն ենք անում, ապա այն բավարար է՝ հասկանալու այդ երկրի տնտեսական վիճակը։ Սակայն դա այդպես չէ։ Օրինակ՝ Կատարում 1 շնչին ընկնող ՀՆԱ-ն 130 հազար դոլար է։ Աշխարհում առաջին տեղն է, բայց ասել, որ Կատարի տնտեսությունը զարգացած տնտեսություն է, ճիշտ չի, և չի կարելի համեմատել Շվեյցարիայի կամ Միացյալ Նահանգների տնտեսության հետ։ Այսինքն՝ մենք պետք է հասկանանք, թե ազգային հարստությունն ինչ չափով է վերաբաշխված հանրության մեջ»։
Մանրամասները՝ տեսանյութում։
