ԱԺ փոխխոսնակ Լենա Նազարյանը ֆեյսբուքյան իր էջում հետևյալ գրառումն է արել.
«Այսօր Ծիծեռնակաբերդում հարգանքի տուրք մատուցեցինք Բաքվի ջարդերի զոհերի հիշատակին։ Երեսուն տարի առաջ՝ 1990թ. հունվարի 13-19-ը, Ադրբեջանի մայրաքաղաք Բաքվում դաժան սպանդի զոհ դարձան և բռնի տեղահանվեցին տասնյակ հազարավոր հայեր. հայերի նկատմամբ 6 օր դրսևորված վայրագություններից հետո շուրջ 250 հազար հայ բնակիչ ունեցող քաղաքը հայաթափվեց:
Բաքվում և Սումգայիթում հայերի դեմ իրականացված գործողությունները կրել են կազմակերպված բնույթ կամ առնվազն իրականացվել են Ադրբեջանի իշխանությունների թողտվությամբ: Եվ հատկանշական է, որ Բաքվի և Սումգայիթի ջարդերին զոհ գնացած հայերի հիշատակը հավերժացնող հուշակոթողը գտնվում է Ծիծեռնակաբերդում։ Այնպես, ինչպես 20-րդ դարի սկզբին թուրքական կառավարությունն իրագործեց առաջին ցեղասպանությունը՝ բնաջնջելով 1,5 միլիոն հայի, այնպես էլ երեսուն տարի առաջ Բաքվում դաժան սպանդի զոհ դարձան և բռնի տեղահանվեցին տասնյակ հազարավոր հայեր՝ միայն իրենց էթնիկ պատկանելության պատճառով։
Հայ ժողովուրդն, անցնելով ցեղասպանության արհավիրքի միջով, այսօր հատուկ պատասխանատվություն է կրում անհանդուրժողականության և խտրականության հիմնարար պատճառների բացահայտման, մարդկության դեմ հանցագործությունների ու ցեղասպանությունների կանխարգելման գործում»: