«Այն, որ Մերձավոր Արևելքը վաղուց վերածվել է եռացող կաթսայի, այն, որ այս տարածաշրջանը վաղուց արդեն աշխարհի քաղաքական քարտեզի վրա ամենաթեժ կետն է համարվում՝ այլևս նորություն չէ: Այն, որ ԱՄՆ-ը և Իրանը միջնորդավորված պատերազմի մեջ են տարածաշրջանում՝ դա նույնպես նորություն չէ, բայց որ երկու երկրների հարաբերություններն այնքան կսրվեն, որ ուղղակի պատերազմի սպառնալիք կլինի նրանց միջև՝ դա շատերիս համար անսպասելի էր»,- ՄԱՀՀԻ-ում կազմակերպված քննարկմանը նշեց իրանագետ Արմեն Վարդանյանը:
Նրա խոսքով՝ երկու երկրներն էլ բավականին հզոր ռազմական տերություններ են, նրանց միջև ուղղակի պատերազմը անպատկերացնելի հետևանքների կբերեր. «Եվ ռեալ պոլիտիկի տեսանկյունից Իրանի պատասխանը միանգամայն արդարացի էր: Իրանին այժմ ձեռնտու չէ ուղղակի պատերազմի մեջ մտնել ԱՄՆ-ի հետ՝ մանավանդ որ երկրում մի քանի տասնյակ հազար մարդիկ պատրաստ են իրավիճակի վատթարացման դեպքում դուրս գալ փողոց և բողոքի ցույցեր անել»:
Ներկայացնելով հավանական սցենարները՝ իրանագետը ամենահավանական սցենար է համարում այն, որ լարվածությունը կշարունակվի մինչև նոյեմբեր՝ մինչև ԱՄՆ-ում կայանալիք նախագահական ընտրությունները: Հաջորդ հավանական սցենարը, ըստ իրանագետի, այն է, որ Իրանը ԱՄՆ-ի հետ կփորձի լեզու գտնել և նոր միջուկային համաձայնագիր կնքել:
Առավել մանրամասն՝ տեսանյութում: