«Դեռևս 2019թ-ի դեկտեմբեր 25-ին «Լիդիան» ընկերությունը հայտարարել էր, որ ապացուցակում է տեղի ունենալու և դա մտնում է իրենց ֆինանսական ռեստրուկտուրիզացիայի (վերակառուցման, ընկերության առողջացման-խմբագրական) մեխանիզմների մեջ, հետևաբար այդ ֆոնդային բորսայից դուրս մնալը կանխատեսելի էր։ Սա նշանակում է, որ «Լիդիան»-ը պետք է փորձի գտնել այլընտրանքային ֆինանսավորում՝ իրենց նախագիծն իրականացնելու համար։ Բնականաբար, սա «Լիդիան»-ի համար բարենպաստ վիճակ չէ, բայց միևնույն ժամանակ նրանք հայտարարել են նաև Կանադայի դատարանից պաշտպանություն ստանալու մասին, հետևաբար պետք է սպասենք հետագա զարգացումներին»,- «Առաջին լրատվական»-ի հետ զրույցում նշեց ՄԱՀՀԻ ասոցացված փորձագետ Արայիկ Պապյանը։
Նշենք, որ Տորոնտոյի ֆոնդային բորսան հունվարի 7-ին որոշում է կայացրել 2020 թ-ի փետրվարի 5-ից «Լիդիան» ընկերությանը (Lydian International Limited) բորսայի ցուցակներից հեռացնելու մասին։
Ինչպես տեղեկացնում է բորսայի կայքը, սույն որոշումը կայացվել է ցուցակագրման պահանջներին շարունակաբար չհամապատասխանության պատճառով։ Ընկերության արժեթղթերի վաճառքը նույնպես կասեցված է։
Հարցին՝ հնարավո՞ր է այս ընկերությունը հայտնվի սնանկացման շեմին և ընդհանրապես կասեցնի իր գործունեությունը, ինչի արդյունքում էլ դադարեցվի նաև Ամուլսարի հանքի շահագործման ծրագրի իրականացումը, մեր զրուցակիցը պատասխանեց․
«Շատ բարդ հարց է և ներկա դրությամբ՝ դժվար է կանխատեսումներ անելը․ ինչպես արդեն ասացի, «Լիդիան»-ը իր պաշտպանության համար դիմել է կանադական դատարան և առաջին նիստը տեղի կունենա հունվարի 23-ին, իսկ մինչ այդ սնանկացման մասին խոսել չենք կարող, քանի որ իրենք պաշտպանված են կանադական դատարանի կողմից։ Եթե կանադական դատարանը չերկարաձգի այդ պաշտպանության ժամկետը, ապա «Լիդիան» ընկերությունը, բնականաբար, կկանգնի սնանկացման առաջ, որովհետև պարտատերերը կսկսեն մասսայաբար պահանջել իրենց գումարները։ Սա շատ ծանր վիճակի մեջ կդնի «Լիդիան»-ին, քանի որ այդ պարագայում նրանք, անշուշտ, կկանգնեն սնանկացման առաջ, ինչպես նաև կպառալիզացվի արբիտրաժ դիմելու նրանց հնարավորությունները։ Կարծում եմ, որ գրեթե ամեն ինչ կախված է կանադական դատարանի առաջիկա որոշումից։
Ենթադրում եմ, որ այս պահի դրությամբ՝ պարտատերերի հետ բանակցություններ են ընթանում, իսկ թե ինչ համաձայնության կգան՝ չգիտեմ, ուստի կանխատեսումներ անելը չափազանց բարդ է»։
Հատկանշական է, որ «Լիդիան Արմենիայի» գործադիր տնօրեն Հայկ Ալոյանը լրատվամիջոցներից մեկին տված հարցազրույցում՝ իրենց ընկերության շուրջ ստեղծված իրավիճակի համար «մեղադրել» էր Հայաստանի ներկայիս կառավարությանը։
«Հայաստանի համար սա ոչ մի լավ բան չի նշանակում, քանի որ սա ազդակ է բոլոր արտաքին ներդրողներին, որ կառավարության անգործությունը հանգեցրեց նման հեղինակավոր բորսայում ցուցակված Հայաստանի միակ, ուզում եմ կրկնել՝ միակ ներդրողի ֆինանսական նման ճգնաժամի և ապացուցակման։ Միտումնավո՞ր, թե՞ անփորձության հետևանքով, դա արդեն երկրի հեղինակության վրա բացասական ազդեցության տեսանկյունից էական չէ։ Ամուլսարի դեմ այս գործընթացը Հայաստանի Հանրապետությանը վնասից բացի ոչ մի օգուտ չի բերել։ Ու Ամուլսարի նման ծրագրից, «Լիդիան»-ի նման ընկերության առկայությունից օգտվելու փոխարեն երկիրը, ոմանց քմահաճույքով, շարունակում է խրվել գնալով մեծացող խնդրի մեջ»,- մասնավորապես հայտարարել էր «Լիդիան» ընկերության գործադիր տնօրենը։
Այս համատեքստում Արայիկ Պապյանը ընդգծեց․
«Պետք է պատրաստվել արբիտրաժային վարույթին․ ըստ իս՝ «Լիդիան»-ը բավականին լավ պատրաստվում է և շատ մտածված ու կազմակերպված գործողություններ է իրականացնում։ Սա Հայաստանի ներդրումային պատմության մեջ այն եզակի դեպքերից է, երբ ներդրողը բավականին պատրաստված ձևով պաշտպանում է իր ներդրումները և այսքանից հետո մնում է սպասել արբիտրաժային վարույթին։ Ընկերության ներկայացուցիչներն ավելի վաղ հայտնել էին նաև, որ իրենք փնտրում են ֆինանսական ռեսուրսներ արբիտրաժային դատարան դիմելու համար, այսինքն՝ դա լինելու է երրորդ կողմի ֆինանսավորմամբ և իրականում ամենահավանական սցենարներից մեկը հենց սա է»։
Հիշեցնենք նաև, որ 2018 թ-ի կեսերից բնապահպանները խոչընդոտում են «Լիդիան» ընկերության կողմից Ամուլսարի հանքի շահագործմանը՝ բնապահպանական և շրջակա միջավայրի վրա հանքի բացասական ազդեցության մտահոգությունների պատճառով։ Բնապահպանները նշում են, որ հանքի շահագործումը կործանարար ազդեցություն կունենա Ջերմուկի վրա։
