Իրանի պատմության մեջ օլիմպիական մեդալ նվաճած միակ կին մարզիկը հայտարարել է, որ քաղաքական դրդապատճառներով արտագաղթել է երկրից: 21-ամյա Կիմյա Ալիզադեն իր որոշման մասին գրել է Instagram-ի էջում:
«Այն ամենն ինչ ես ուզում եմ թեքվոնդոն է, անվտանգությունը, երջանիկ և առողջ կյանքը», – նշել է Ալիզադեն:
Ալիզադեն իրեն որակել է որպես «Իրանում միլիոնավոր ճնշված կանանցից մեկը»: «Նրանք ինձ ուղարկում էին այնտեղ, ուր ուզում էին: Ես հագնում էի այն, ինչ նրան ուզում էին: Ես կրկնում էի այն, ինչ նրանք ասում էին: Նրանք ինձ շահագործում էին, երբ անհրաժեշտ էին համարում», – գրել է մարզիկը:
Նա հավելել է, որ Իրանի իշխանությունները միաժամանակ և ուրախանում էին իր հաղթանակներով և քննադատում իր ընտրած մարզաձևը: «Առաքինի կինը չպետք է լայն բացի ոտքերը», – մեջբերել է Ալիզադեն իրանցի սպորտի ղեկավարների խոսքերը:
Մարզիկի գրառումից հետևում է, որ նա մեկնել է Եվրոպա: Ըստ իրանական ISNA գործակալության, հավանաբար, նա Նիդեռլանդներում է:
Նշենք, որ 2016 թվականին Կիմյա Ալիզադեն Ռիո դե Ժանեյրոյի Օլիմպիական խաղերի թեքվոնդոյի մրցաշարում նվաճեց բրոնզե մեդալ: Ալիզադեն օլիմպիական մեդալ նվաճած առաջին և առայժմ միակ իրանցի կին մարզիկն է: