ԱՄՆ նախագահ Դոնալդ Թրամփը Իրանի ղեկավարությանը կոչ է արել «դադարեցնել ցուցարարների սպանությունը», միացնել երկրում ինտերնետը և լրատվամիջոցների ներկայացուցիչներին թույլ տալ ազատ տեղաշարժվել երկրում:
«Իրանի առաջնորդներին. մի սպանեք ցուցարարներին, դուք արդեն սպանել և բանտարկել եք հազարավոր մարդկանց: Աշխարհը հետևում է: Ավելին, հետևում են Միացյալ Նահանգներում: Միացրեք ինտերնետը և լրագրողներին թույլ տվեք ազատ տեղաշարժվել երկրում: Դադարեցրեք ձեր հիանալի իրանցի ժողովրդի սպանությունը»,- գրել է Թրամփը Twitter-ի իր էջում:
Շաբաթ օրը Թրամփը Twitter-ի իր միկրոբլոգում պարսկերենով աջակցել է իրանցի ցուցարարներին: Ըստ ԱՄՆ նախագահի, Իրանի իշխանությունները «պետք է թույլ տան, որ իրավապաշտպան խմբերը հետևեն և գրանցեն փաստերը» երկրում ընթացող բողոքի ցույցերի վայրերից:
Հարյուրավոր ուսանողներ են հավաքվել Թեհրանի Ամիր Քաբիրի անվան համալսարանի շենքի մոտ՝ ուկրաինական ինքնաթիռի վթարի հետևանքով զոհվածների հիշատակը հարգելու համար: Ակցիան վերաճել է հանրահավաքի, որի մասնակիցներին ցրել է ոստիկանությունը, հայտնում է Fars-ը: Ցույցի մասնակիցները՝ 700-ից հազար ուսանող, «արմատական կարգախոսներ» են վանկարկել՝ պահանջելով աղետի համար պատասխանատու անձանց հրաժարականը և դատական հետապնդումը: