Լուրեր
Հետհեղափոխական դեպրեսիա է․ Ամեն մեկը կարծիք հայտնելու իրավունք չունի, դա պետք է վաստակել

Գիրքը մարդու և աշխարհի հարաբերությունների հիմքում է, ինչպես նաև մարդու պատկերացումների, աշխարհայացքի ձևավորման հիմքում է: Ինչպիսի՞ն են այժմ այդ հարաբերությունները, երբ խորքային տրանսֆորմացիաներ են տեղի ունենում: «Առաջին լրատվական»- ի հետ զրույցում անդրադառնալով այս հարցին՝ գրականագետ, խմբագիր Արքմենիկ Նիկողոսյանը նշեց. «Կարծում եմ, որ գուցե փոխվում են ձևակերպումները, անունները, բայց հիմքում այն է, ինչ նշեցիք, որովհետև առանց գրքի հետ հարաբերումի ես չեմ պատկերացնում կենսագործունեության որևէ վիճակ… Գիրք կարդալ ասելով՝ նկատի չունենք ահռելի գրադարան, որի բոլոր գրքերը պետք է կարդալ: Շատ մարդկանց կյանքը, անգամ տեսակը կարող է փոխել գրքից մեկ արտահայտությունը, որը կարող է նա պատահաբար լսել որևէ մեկից: Այլ հարց է, որ այսօր ժամանակակից մարդը, ժամանակակից հասարակությունները տարբեր տրանսֆորմացիաների են ենթարկվում: Կարծում եմ՝ աշխարհի բոլոր հասարակությունների խնդիրն այն է, որ չկան կայուն արժեհամակարգեր…»:

Գրականագետի դիտարկմամբ՝ Հայաստանի հասարակությունն ավանդաբար եղել է փակ հասարակություն. «Պրոբլեմների մասին չբարձրաձայնող, փակ հասարակություն, որտեղ ամեն մեկը չի ունեցել ձայն, չի ունեցել խոսելու հնարավորություն: Այսօր սոցիալական հարթակները յուրաքանչյուրին տվել են խոսելու հնարավորություն: Դա գիտե՞ք ինչ գարշելի բան է: Մարդը կարծիք հայտնելու համար պետք է վաստակի այդ իրավունքը»:

Ցանկացած հեղափոխություն պայթյուն է, որը խթանում է նոր մտքեր, նոր ինտելեկտուալ ներուժի ներկայացում: Անդրադառնալով այս դիտարկմանը՝ Արքմենիկ Նիկողոսյանն ընդգծեց, որ թավշյա հեղափոխությունից հետո լուրջ փոփոխություններ եղան, բայց հեղափոխությունից առաջ նույնպես ինտելեկտուալ փոփոխություններ եղան, և թավշյա հեղափոխությունը նաև դրա արդյունք է: «Պատահական չէ, որ թավշյա հեղափոխության տարում և դրանից մի քիչ առաջ Հայաստանում գրանցվեցին գրքի ամենաշատ վաճառքները, ամենաշատ այցելությունները գրադարան և գիրքը սկսեց վերաարժևորվել և կարևորվել մեր հասարակության մեջ: Սկսեցին կարդալ հատկապես երիտասարդները»,- նշեց մեր զրուցակիցը՝ հավելելով, որ գլոբալ փոփոխությունների հետ կապված՝ մեծ հույսեր է կապում երիտասարդների հետ:

Արքմենիկ Նիկողոսյանը նաև կարծիք հայտնեց, որ մեր հասարակությունը գտնվում է հետհեղափոխական դեպերսիայի մեջ:

Մանրամասն՝ տեսանյութում:

  • Դիտումներ՝ *