«Արդեն իսկ կարող ենք արձանագրել, որ աշնանացան բերքի լուրջ կորուստ կարող ենք ունենալ։ Դաշտերը ձյան շերտով ծածկված չեն, իսկ դա կբերի բերքի կորստի»,- «Առաջին լրատվական»-ի հետ զրույցում ասաց «Ագրոգյուղացիական միավորում» ՀԿ նախագահ Հրաչ Բերբերյանը։
Ինչ վերաբերում է առհասարակ ձմռան այս տաք եղանակին և դրա ազդեցությանը գյուղատնտեսության վրա, Բերբերյանը դեռ վաղ է համարում ընդհանուր կանխատեսումներ անելու համար։ «Դեռ պետք է մի 10-15 օր սպասենք, նոր կարելի է ասել, թե ինչ կլինի։ Այս պահին միանշանակ է միայն աշնանացանի կորստի փաստը։ Տեղեր կլինեն՝ ընդհանրապես բերք չի լինի, տեղեր կլինեն՝ թերի բերք կլինի»,- ասաց մեր զրուցակիցը։
Բացի դրանից, Բերբերյանի խոսքերով՝ խնդիր է նաև սարերում ձնագոյացումը, որը կբերի նրան, որ ջրամբարները ջրով չեն լցվի, և ամռան ամիսներին, ոռոգման սեզոնին կարող ենք փաստի առաջ կանգնել։
Նշենք, որ ըստ կանխատեսումների՝ հունվար ամիսը ևս տաք է լինելու։ Հիդրոմետ ծառայության պետ Գագիկ Սուրենյանը նախօրեին գրել էր, որ հունվար ամիսը նույնպես հանրապետության տարածքում կանխատեսվում է տաք։ Ամսական միջին ջերմաստիճանը բոլոր մարզերում կլիմայական նորմայից բարձր կլինի 3-4 աստիճանով, տեղումների քանակը կլինի նորմայի սահմաններում։
Ըստ Բերբերյանի, սակայն, այդ կանխատեսումները հաճախ իրականություն չեն դառնում և, ըստ իրենց դիտարկումների, սովորաբար հունվարի 10-15-ից հետո տեղումներ են լինում, և խնդիրներ չեն առաջանում։ «Ցավոք, կանխատեսումները շատ ժամանակ սխալ են լինում։ Կլիմա է, փոխվեց-փոխվեց։ Մի քանի տարի առաջ կանխատեսվել էր ցրտահարություն, մարդիկ էլ ջերմոցները փորձեցին ջեռուցել, ու Մասիսում մի տղամարդ իր կնոջը հոսանքով սպանեց, բայց ցրտահարում այդպես էլ չեղավ։ Այնպես որ, ամեն ինչ միանշանակ չէ։ Համենայնդեպս, դեռ խնդիր չունենք ծառերի բողբոջման հետ, նման դեպքեր չեն արձանագրվել, երեկոները բավական ցածր է լինում ջերմաստիճանը և Արարատյան հարթավայրում։ Եկեք չշտապենք ու մի երկու շաբաթ էլ սպասենք»,-ասաց Բերբերյանը։