Արքայազն Հարին և Մեգան Մարքլը պատմել են, թե ինչպիսին է լինելու իրենց ֆինանսական անկախությունը բրիտանական թագավորական ընտանիքի հետ վերջնական բաժանումից հետո: Նրանք նկարագրել են իրենց հետագա կյանքի մանրամասները հատուկ ստեղծված sussexroyal.com կայքում:
Հիմնական փոփոխությունը կլինի անկախ դրամաշնորհի մերժումը, որից այժմ ձևավորվում է Սասեքսի դուքսի և դքսուհու ծախսերի հինգ տոկոսը: Դրամաշնորհը ձևավորվում է «Գահի» սեփականությունից (այսպես կոչված՝ հողերի ամբողջություն և պետությանը պատկանող այլ ակտիվներ) ստացված եկամտի 15 տոկոսից․ 85 տոկոսը բաժին է ընկնում պետբյուջեին:
Արքայազնի և նրա կնոջ ամսական բյուջեի մնացած 95 տոկոսը կհատկացվի Ուելսի արքայազնին՝ Հարիի հորը և Ուիլյամին: Անկախ դրամաշնորհը ծածկում է պաշտոնական այցերի, կացարանի և այնտեղ աշխատողների ծախսերը:
Գործող կանոնները թագավորական ընտանիքի անդամներին արգելում են ինքնուրույն վաստակել և ստանալ այլ առևտրային եկամուտներ: Ամուսինները պատրաստվում են հեռանալ այդ կանոններից:
Զույգի համար եկամտի հիմնական աղբյուրներից կարող են լինել դասախոսությունները և հանրային ելույթները՝ գրում է Bloomberg-ը: Բացի այդ, նրանք կկարողանան վաստակել գովազդով: Միևնույն ժամանակ, և՛ արքայազն Հարին, և՛ Մեգան Մարքլը առանձին-առանձին արդեն ունեն բավականին մեծ ունեցվածք. դրանք համապատասխանաբար կազմում են մոտ 40 և հինգ միլիոն դոլար: Այս գումարը Մարքլը վաստակել է դերասանական կարիերայի ընթացքում: Միգուցե այդ միջոցների մի մասը կմնա որպես արքայական ընտանիքի սեփականություն. վերլուծաբանները դժվարանում են ճշգրիտ պատասխան տալ, քանի որ ստեղծված իրավիճակը արտառոց է:
