Չինաստանի Ուհան քաղաքում (Հուբեյի նահանգ) 61-ամյա տղամարդը մահացել է թոքաբորբից, որը զարգացել է նախկինում անհայտ վիրուսի պատճառով: Այդ մասին հայտնում է Reuters-ը:
Բացի այդ, հիվանդին ախտորոշել են նաև լյարդի հիվանդություն, իսկ բերանի խոռոչում ուռուցք են հայտնաբերել: Այնպես որ, դեռևս բժիշկները չեն կարող վստահորեն ասել, որ մահվան պատճառը վիրուսի վարակն է եղել:
Դա կորոնավիրուսի նոր տեսակ է: Ենթադրվում է, որ վարակվում են կենդանիների հետ շփման, ինչպես նաև հում ծովամթերքի օգտագործման պատճառով: Մի քանի շաբաթ է, ինչ անհայտ ծագման թոքաբորբը ակտիվորեն տարածվում է Հուբեյում: Դեկտեմբերին արձանագրվել է վարակի 27 դեպք, հունվարի 5-ի դրությամբ 59 վարակված դիմել է բժշկական օգնություն: 61-ամյա տղամարդու մահը առաջին դեպքն է:
