Ճամփորդական TheTravel կայքն ընթերցողներին ճանապարհորդության հետաքրքրիր ուղղություններ է առաջարկել. կայքն առանձնացրել է 20 տեսարժան վայրեր ամբողջ աշխարհից, որոնք, ըստ կայքի, ավելի հին են, քան Սթոունհենջը: Հոդվածագրի աչքից չի վրիպել նաև Հայաստանի «Զորաց քարեր» պատմամշակութային արգելոցը:
Հոդվածագիրը նկատել է՝ շատ հին քարերը բավականին տարածված են, բայց Զորաց քարերի ատամնավոր եզրերը այն դարձնում են շատ ավելի իսկական: Հայաստանի շքեղ ամառային տեսարանը նման վայրերը դարձնում է էլ ավելի գրավիչ՝ ճամփորդությունը պլանավորելիս:
Քարահունջը (Զորաց քարեր, Քարենիշ), նախապատմական մեգալիթյան կառույց է: Այն «Զորաց քարեր բնակատեղի» անունը կրող պատմամշակութային արգելոց և պետության կողմից պահպանվող հատուկ տարածք է: Մի շարք գիտնականներ և հետազոտողներ պնդում են, որ մեգալիթյան կառույցը աստղադիտարան է: Գիտական և սիրողական որոշ շրջանակներ մերժում են աստղադիտարան լինելու հանգամանքը և պնդում, որ այն դամբարանաշերտ է:
Մեգալիթյան կառույցի անվան և նշանակության մասին առկա հակասական կարծիքներն ու պնդումները հաճախ վերածվում են վեճերի ինչպես գիտական, այնպես էլ հասարակական շրջանակների միջև:
