«Ես սիրում եմ մեջբերել ամերիկացի քաղաքական գործիչ Ռուդոլֆ Ջուլիանիի խոսքերը Հայաստանի վերաբերյալ, այն է. «Ես այստեղ չեմ տեսնում հեղափոխություն, այլ տեսնում եմ կառավարության փոփոխություն»: Այս գնահատականի հետ վիճելը շատ դժվար է»,- «Առաջին լրատվական»-ի հետ զրույցում նշեց քաղաքագետ Արմեն Հովհաննիսյանը՝ ի պատասխան հարցի, թե հնարավո՞ր չէ կարմիր գիծ քաշել ներկայի և անցյալի միջև, թեկուզ ուշացած:
Մեր զրուցակիցը, հաշվի առնելով բոլոր ոլորտներում արմատական փոփոխություններից խուսափելը, փոքր-ինչ փոփոխեց Ջուլիանիի գնահատականը՝ ասելով. «Կառավարող շրջանակը չի ընկալում սա որպես հեղափոխություն, այլ ընկալում է այսպես՝ իրենցից առաջ վատ մարդիկ են կառավարել և վատ ձևով, իսկ իրենք լավն են, իրենք ազնիվ նպատակներ ունեն: Հիմա իրենք պետք է կողմնորոշվեն՝ դա կառավարության փոփոխությո՞ւն է, թե՞ իսկապես մենք 20 տարուց ավելի ապրել ենք մի վարչակարգի օրոք, որը ոտնահարել է հասարակության և առանձին մարդկանց իրավունքները, կեղեքել է, բռնազավթել է իշխանությունը»:
Քաղաքագետի խոսքով՝ կառավարող շրջանակը մի ոտքով ուզում է հեղափոխական ֆրազիոլոգիայի մեջ մնալ, մյուս ոտքը պահել համակարգի մեջ, որը ժողովրդի կողմից դատապարտվել է 2018թ. ապրիլին. «Մարդիկ փողոց էին դուրս եկել, որովհետև այդպես ապրել այլևս անհնար էր: Մեզ պետք էին ինստիտուցիոնալ և աշխարհայացքային փոփոխություններ, որոնք այժմ ես չեմ տեսնում»:
Քաղաքագետ Էդգար Վարդանյանը, սակայն, չի կարծում, թե սա սոսկ իշխանափոխություն էր: «Սա հեղափոխություն էր, որովհետև տեղի է ունեցել կոնկրետ ռեժիմի փոփոխություն: Շփոթության պատճառն այն է, որ ֆորմալ առումով ունեցել ենք դեմոկրատական քաղաքական համակարգ, և այս առումով որևէ փոփոխություն տեղի չի ունեցել, մնացել են նույնիսկ հին օրենքները, Սահմանադրությունը: Եվ ես խոր կասկած ունեմ, որ եթե այդ ինստիտուտները, օրենքները դրվեին մի որևէ ժողովրդավարական համակարգի մեջ, դրանք կհամարվեին հակաժողովրդավարական»,- «Առաջին լրատվական»-ի հետ զրույցում նշեց նա:
Քաղաքագետի խոսքով՝ տեղի է ունեցել ոչ միայն մարդկանց փոփոխություն, այլև փոխվել են խաղի կանոնները. «Այլևս իշխող կուսակցությունը և պետությունը սերտաճած չեն, այլևս օլիգարխները չեն որոշում, թե ինչպիսին պետք է լինի կյանքը, և նրանք չեն ասում՝ սրան պատժեք, սրան՝ ոչ»:
Հարցազրույցն ամբողջությամբ՝ տեսանյութում: