Սոս Սարգսյանի անվան համազգային թատրոնի նոր շենքի կառուցման աշխատանքների զգալի մասը կատարված է:
Ասուլիսում Սոս Սարգսյանի անվան համազգային թատրոնի տնօրեն Արման Նավասարդյանը տեղեկացրեց, որ արդեն ընթանում են տանիքի աշխատանքները: Շուտով կսկսվեն շենքի ներքին հարդարման աշխատանքները:
«Աշխատանքները մեծ թափով առաջ են գնում, հույս ունեմ, որ 2020 թվականին, վերջապես, կունենանք այն շենքը, որը տարիներ շարունակ երազել ենք ունենալ: Այստեղ մի հարց կա. կառուցապատողը պարտավորվել է անել շենքի հետ կապված բոլոր աշխատանքները՝ բացի բեմի մեխանիկական մասի, լուսային, հնչունային սարքավորումների ապահովումից: Դա համարվում է խիստ մասնագիտական, կառուցապատողը չի կարող զբաղվել: Հիմա մենք պետք է այդ խնդիրը լուծենք»,-ասաց Արման Նավասարդյանը:
Լրագրողների այն հարցին, թե արդյոք կդիմե՞ն պետությանը այդ հարցում ևս աջակցելու համար, Արման Նավասարդյանը նշեց, որ չի ցանկանում պետությանը նեղ վիճակի մեջ դնել: Նա փորձում է գտնել հովանավորներ, արդեն որոշ կազմակերպությունների դիմել է, որոշների հետ էլ կապի մեջ կլինի առաջիկայում: Ըստ նախնական տվյալների, մոտավորապես 500 հազար ԱՄՆ դոլարի մասին է խոսքը:
Սոս Սարգսյանի անվան Համազգային թատրոնի նոր շենքի հիմնարկեքի արարողությունը տեղի է ունեցել 2019 թվականի մարտին, որին ներկա էր ՀՀ վարչապետ Նիկոլ Փաշինյանը: Շենքը գտնվում է Երևանի թատրոնի և կինոյի պետական ինստիտուտի հարևանությամբ: