«Ինքնաթիռի հրթիռային խոցման վարկածը չի բացառվում, բայց դեռևս հաստատված չէ»,- հայտարարել է Ուկրաինայի նախագահ Վլադիմիր Զելենսկին: Նախագահն ընդգծել է, որ, հաշվի առնելով ԶԼՄ-ներում պետություների ղեկավարների արած վերջին հայտարարությունները, Կիևը կոչ Է անում միջազգային բոլոր գործընկերներին, նախևառաջ ԱՄՆ-ին, Կանադային և Մեծ Բրիտանիային, ավիաաղետին վերաբերող տվյալներն ու ապացույցները տրամադրել դրա պատճառների հետաքննությամբ զբաղվող հանձնաժողովին:
Ավելի վաղ Կանադայի վարչապետ Ջասթին Թրյուդոն հայտարարել էր, որ Օտտավան տարբեր աղբյուրներից, այդ թվում՝ կանադական հատուկ ծառայություններից, ստացել է տեղեկատվություն , որի համաձայն օդանաբը խոցվել է իրանական «երկիր-օդ» դասի հրթիռով: Ընդ որում նա ընդգծել էր, որ Իրանը կարող էր ինքնաթիռը խոցել ոչ կանխամտածված:
Նմանատիպ տեսակետ է հայտնել նաև Մեծ Բրիտանիայի վարչապետ Բորիս Ջոնսոնը: Մինչդեռ Իրանի կառավարության պաշտոնական ներկայացուցիչ Ալի Ռաբիին «խաբեբայություն» Է որակել այդ մեղադրանքները:
«Երբ հայտնի կդառնա, որ մեղադրանքները խաբեբայություն են, ոչ ոք չի համարձակվի իր վրա վերցնել նման մեծ ստի պատասխանատվությունը»,- հայտարարել է Ռաբիին: Նա մեղադրանքները որակել Է որպես «ԱՄՆ-ի կառավարության հոգեբանական գործողություն»:
