Instagram-ի՝ Իրանի իրադարձություններին նվիրված @Khabarbin էջում հապարակվել է երրորդ լուսանկարը, որը ենթադրաբար արված է Իրանում Boeing 737-800 միջազգային ավիաուղիների կործանման վայրում և ցույց է տալիս զենիթային հրթիռի մի հատված:
Լուսանկարը, որում հրթիռի հատվածը, ի տարբերություն նախորդ լուսանկարների, այլ տեսանկյունից է լուսանկարված՝ նկատել է Bellingcat առցանց լրատվամիջոցի հիմնադիր, բրիտանացի լրագրող Էլիոթ Հիգինսը: Ինչպես մյուս երկու դեպքերում, նա խոստովանել է, որ այս պատկերը նույնպես հնարավոր չէ ստուգել՝ տարբերակիչ մանրամասների բացակայության պատճառով: Սակայն փորձագետը նշել է, որ համացանցում այդ պատկերների ավելի վաղ պատճենները հնարավոր չէ գտնել:
Այս կադրերի հիման վրա համացանցում ենթադրություններ են արվել, որ ուկրաինական Boeing-ը, հնարավոր է, խոցվել է «Tor» զենիթահրթիռային համակարգից արձակված հրթիռով. նման զինատեսակ ունի Իրանի բանակը:
Լրագրող Բաբակ Թաղվեյը Twitter-ի իր միկրոբլոգում, մասնավորապես, ենթադրում է, որ «Իսլամական հեղափոխության պահապանների կորպուսը PS752-ը շփոթել է ամերիկյան ռազմաօդային ուժերի կործանիչի հետ և խոցել այն»: Նա հավելել է, որ վթարից առաջ իր զրուցակիցներից մեկը «փոքր պայթյուններ է լսել Փարանդայի շրջանում», որտեղ ընկել է ինքնաթիռը:
Հրթիռի հետ կապված վարկածը, ինչպես և այլ տարբերակներ խոստացել է ուսումնասիրել Ուկրաինայի կառավարությունը, որ իր մասնագետներին ուղարկել է Իրան՝ աղետի հետաքննությանը մասնակցելու համար: Ըստ Իրանի ավիացիոն իշխանությունների՝ ինքնաթիռը վթարի է ենթարկվել տեխնիկական խնդիրների պատճառով, իսկ Թեհրանի օդանավակայանում, որտեղից այն դուրս է եկել, ասել են, որ այրվել է ինքնաթիռի շարժիչը: