Արժույթի միջազգային հիմնադրամի տվյալներով՝ 1 շնչին ընկնող ՀՆԱ-ով Հայաստանը 2019 թվականին առաջ է անցել Վրաստանից, իսկ այս տարի կանցնի նաև Ադրբեջանից։ Սա, իհարկե, հրաշալի է հնչում, սակայն փաստացի Հայաստանի քաղաքացու կենսամակարդակում գրանցված փոփոխությունների իմաստով ի՞նչ ունենք, որովհետև նախկինում էլ ՀՆԱ-ի աճ ունեցել ենք, բայց, ինչպես գիտեք, այն բարելավել է շատ փոքր հատվածի տնտեսական վիճակը․ «Առաջին լրատվական»-ի հարցին ԱԺ «Իմ քայլը» խմբակցության պատգամավոր Արտակ Մանուկյանը պատասխանեց․ «Նախ ասեմ, որ ոչ թե առաջ է անցել, այլ անցնելու է, որովհետև դեռ տարեկան ցուցանիշների նույնիսկ օպերատիվ վիճակագրությունը չկա, բայց 2019-ի 11 ամիսների վիճակագրությունը թույլ է տալիս պնդել, որ մենք կունենանք էլ ավելի մեծ տնտեսական աճ, քան ԱՄՀ-ն կանխատեսում էր։ Այսինքն՝ 6 տոկոսի փոխարեն ներկա պահին ունենք 7,5 տոկոս տնտեսական աճ։ Այդ ֆոնի վրա, երբ մենք ուսումնասիրում ենք ԱՄՀ-ի կանխատեսումները, ապա Վրաստանի վիճակագրական տվյալներով՝ 4,8 տոկոս տնտեսական ակտիվություն է, ինչը համադրելի է ԱՄՀ-ի կողմից արձանագրված տվյալներին։
Իսկ ինչ վերաբերում է Ադրբեջանի մասով 2020 թվականին 1 շնչի հաշվով ՀՆԱ-ի ավելացմանը, ապա այստեղ նույնպես բազում գործոններ կան, որոնց մասին պետք է խոսենք։ Բայց զուտ գնահատականի տեսանկյունից ակնկալվում է, որ մենք 1 շնչի հաշվով ՀՆԱ-ի ցուցանիշով շուրջ 40 ԱՄՆ դոլարով առաջ կլինենք, քան Ադրբեջանը։
Այժմ խոսենք որակական տեսանկյունից։ Սա ի՞նչ է տալիս նախ շարքային քաղաքացուն։ Այս հարցին պատասխանելուց առաջ մենք պետք է հասկանանք, որ ՀՆԱ-ն շատ վիճահարույց ցուցանիշ է։ Մենք ֆորմալ առումով հանրային հարստությունը կամ, այսպես ասած, ապագա սերունդներին թողած արժեքները կարող ենք թալանել, օրինակ՝ անտառները, հանքերը շահագործման տանք և ունենանք բավականաչափ մեծ ՀՆԱ, ու դրան զուգընթաց չունենալ սերունդների համար երկարաժամկետ հեռանկարներ թողնելու հնարավորությունը»։
Մանրամասները՝ տեսանյութում։