Իրանում «Ուկրաինայի միջազգային ավիաուղիների» օդանավի աղետի ենթարկվելու հնարավոր պատճառներից մեկը կարող էր լինել ռուսական զենիթային «Тор» համակարգից արձակված հրթիռը: Այս մասին հայտարարել է Ուկրաինայի Ազգային անվտանգության եւ պաշտպանության խորհրդի նախագահ Ալեքսեյ Դանիլովը, պատասխանելով «Цензор.нет»-ին:
Նրա խոսքերով, նման տարբերակ նույնպես ուսումնասիրվում է: Ուկրաինացի մասնագետները, որոնք այժմ գտնվում են Իրանում, փնտրելու են հրթիռի կտորներ: Դանիլովն ընդգծել է, որ Թեհրան մեկնած մասնագետների մի մասը մասնակցել է 2014-ին Դոնբասում վթարի ենթարկված մալայզիական «Բոինգի» հետաքննությանը եւ այնտեղ հետազոտել է ռուսական «Бук» զենիթային համակարգի հրթիռների մասնիկները, ինչը և, ըստ ուկրաինացիների, եղել էր օդանավի կործանման պատճառը:
Շրջանառվող այլ պատճառներից են նաև օդանավում տեղի ունեցած պայթյունը, որը կարող էր լինել ահաբեկչության արդյունք, շարժիչի տեխնիկական պատճառներով ծագած պայթյունը, օդանավի բախումն անօդաչուի կամ այլ թռչող օբյեկտի հետ:
Ուկրաինական օդանավը վթարի էր ենթարկվել հունվարի 8-ին: Օդանավում եղել են 167 ուղեւորներ տարբեր երկրներից: Հետաքննությունը վարում է իրանական կողմը, Թեհրանում հենց սկզբից պնդում էին, որ աղետի պատճառները տեխնիկական են, ավելի ուշ այդ տարբերակն ամենահավանականն անվանեցին եւ արեւմտյան հատուկ ծառայությունները:
Երեկոյան սոցցանցերում լուսանկար հայտնվեց, որն իբր արվել էր աղետի վայրում: Լուսանկարի հեղինակը պնդում էր, որ լուսանկարում «Тор» զենիթա-հրթիռային համակարգի հրթիռի մասնիկ է: Լուսանկարն արդեն գրավել է շատերի ուշադրությունը: