19-ամյա Սթիվեն Սաթթոնի պատմությունը ցնցել է ողջ Մեծ Բրիտանիան: Երբ նրան ախտորոշվել է աղիքի քաղցկեղ մահացու հիվանդությունը, նա սկսել է համացանցով քաղցկեղով հիվանդ դեռահասների հիվանդության դեմ պայքարի համար միջոցներ հավաքել: Հիվանդության նկատմամբ նրա վերաբերմունքը հեղաշրջել է միլիոնավոր օգտատերերի գիտակցությունը. Սթիվենի նախագիծը կարճ ժամանակում հավաքել է ավելի քան 2 մլն ֆունտ՝ հայտնում են The Guardian-ը և The Independent-ը:
Պարբերականների տեղեկությամբ՝ իր աշխտորոշման մասին Սթիվենն իմացել է 15 տարեկանում: Բժիշկների խոսքով՝ նրա հիվանդությունն անբուժելի է: Այդ ժամանակ տղան Facebook-ի իր էջում հրապարակել է ցանկությունների ցուցակ՝ ամենը, ինչ նա կուզենար հասցնել անել մահվանից առաջ, և այն անվանել է «Սթիվենի պատմությունը» (Stephen’s Story):
Ըստ 46 կետից բաղկացած այդ ցուցակի՝ երիտասարդը երազել է փղի գրկել, 90.000 հոգանոց հանդիսատեսի առջև թմբուկ նվագել, Մաչու-Պիկչու այցելել և դաջվածք անել: Առաջին տեղում եղել է դեռահասների քաղցկեղի դեմ պայքարի բրիտանական հիմնադրամի համար միջոցների հավաքագրումը, որը փոքր կազմակերպություն է և օգնում է 13-24 տարեկան հիվանդ երիտասարդներին: Սթիվենը երազել է նրանց համար 10.000 ֆունտ հավաքել:
Հոդվածը գրելու պահին հավաքված գումարը կազմել է 2 մլն 225 հազար ֆունտ:
Շուտով «Սթիվենի պատմությանը» միացել են բրիտանացի հայտնիները՝ «Բութ մատը վեր» (Thumb’s up!) ակցիայով, որը խորհրդանշում է Facebook-ի հավանելու նշանը:
«19 տարեկանում նա մի քանի տարում արել է այն, ինչ շատերն ամբողջ կյանքի ընթացքում են անում»,- ասել է բրիտանացի կոմիկ Ջեյսոն Մենֆորդը, ով առաջիններից է միացել ակցիային:
