Այն-էլ-Ասադ բազայում և Էրբիլ քաղաքի օդանավակայանում չկան Patriot և Avenger տեսակի ամերիկյան զենիթա-հրթիռային համակարգեր, հավաստում է Պենտագոնի աղբյուրը։
Ամերիկյան զինվորականներն անգամ չեն փորձել խոցել Իրանի կողմից Իրաքի ամերիկյան բազաների վրա բաց թողնված բալիստիկ հրթիռները, քանի որ այս տարածաշրջանում ամերիկացիները չունեն հակահրթիռային պաշտպանության համակարգեր։
Այս մասին հունվարի 8-ին հաղորդել է FoxNews հեռուստաալիքը՝ հղում անելով Պենտագոնի աղբյուրներին։
Նշվում է, որ ամերիկյան զենիթա-հրթիռային Patriot և Avenger համակարգերը տեղակայված են Մերձավոր Արևելքի այլ կետերում, բայց ոչ Այն-էլ-Ասադ բազայում և Էրբիլ քաղաքի օդանավակայանում։
«Վերջին տարիներին մենք մեր ուշադրությունը սևեռել ենք «Իսլամական պետություն» խմբավորումը ջախջախելու և Իրաքում ռազմական աննշան ներկայություն ապահովելու վրա։ ԻՊ-ի դեմ պայքարում մեզ պետք չեն եղել հակահրթիռային համակարգեր»,- պարզաբանել է հեռուստաալիքի աղբյուրներից մեկը Պենտագոնից։
Հիշեցնենք, որ հունվարի 8-ին իրանական կողմից արձակված հրթիռներն ընկել են Իրաքում ամերիկյան երկու բազաների վրա, որտեղ ամերիկացի զինվորներ չեն եղել։
