Նախօրեին Հատուկ քննչական ծառայությունում Քրեական օրենսգրքի 311-րդ հոդվածի 1-ին մասի հատկանիշներով («պաշտոնատար անձի կողմից կաշառք ստանալը») քրեական գործ է հարուցվել ոստիկանության Երևան քաղաքի վարչության քրեական հետախուզության բաժնի 3-րդ բաժանմունքի ավագ օպերլիազոր, ոստիկանության ավագ լեյտենանտ Ստեփան Սիմոնյանի դեմ։ Վերջինս մեղադրվում է մի քաղաքացուց 500 դոլար կաշառք վերցնելու մեջ։
«Առաջին լրատվականի» հետ զրույցում, Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը, մեկնաբանելով իրավիճակը, ասաց, որ այդ եղանակով «խոշոր հանցագործները պայքարում են փոքր հանցագործների դեմ»՝ ցույց տալու, որ իրենք ազնիվ են։
«Պարբերաբար, ժամանակ առ ժամանակ նմանատիպ դեպքերով փորձում են ապացուցել՝ իբր պայքարում են կոռուպցիայի դեմ։ Ձերբակալում են ամենացածր, ստորին պաշտոններ զբաղեցնողներին»,- ասաց Ա.Սաքունցը՝ նշելով, որ դա իրականում իմիտացիոն պայքար է։ Ըստ նրա՝ այդ մարդիկ հանդես են գալիս ոչ միայն քավության նոխազի դերում, այլև այդ եղանակով խեղվում է նրանց ճակատագիրը՝ թաքցնելու խոշոր կոռուպցիոն համակարգը։
«Ի՞նչ է, այդ օպերլիազորը այդ 500 դոլարը միայնա՞կ էր մսխելու։ Իհարկե ո՛չ»,- ավելացրեց իրավապաշտպանը։