Վավերագրական կինոյի ամերիկացի ռեժիսոր Մայքլ Մուրը Իրանին ուղղված տեքստ է հրապարակել, որում ցավակցություն է հայտնել Իսլամական հեղափոխության պահապանների կորպուսի գեներալ Ղասեմ Սոլեյմանիի սպանության համար: Գրառումը նա հրապարակել է Twitter-ում՝ պարսկերենով:
Հրապարակման մեջ Մուրը ցավակցություն է հայտնել այն կապակցությամբ, որ նախագահ Դոնալդ Թրամփը Միացյալ Նահանգների անունից սպանել է Սոլեյմանիին՝ դրանով իսկ «բռնություն» իրականացնելով: Նրա խոսքերով, ԱՄՆ-ի քաղաքացիների մեծ մասը ընտրություններում չի քվեարկել Թրամփի օգտին: Նա Թեհրանին կոչ է արել ագրեսիվորեն չարձագանքել Թրամփի գործողություններին, այլ ամերիկացի ժողովրդին նրան նախագահի պոստից հեռացնելու հնարավորություն տալ:
Ավելի վաղ Միացյալ Նահանգների և Իրանի միջև հարաբերությունների լարվածության մասին խոսել է ԱՄՆ Կոնգրեսի Ներկայացուցիչների պալատի խոսնակ Նենսի Փելոսին: Նա քննադատել է նախագահի գործողությունները և կոչ արել դադարեցնել Սպիտակ տան վարչակազմի անհարկի սադրանքները:
Մուրը հայտնի է Թրամփի հանդեպ իր քննադատական վերաբերմունքով: Նա բազմիցս բացասաբար է արտահայտվել Միացյալ Նահանգների 45-րդ նախագահի գործունեության վերաբերյալ: 2017-ին նա գործարկել է TrumpiLeaks նախագիծը, որպեսզի նրան կարողանան անանուն կերպով տեղեկություններ փոխանցել նախագահի և նրա վարչակազմի մասին:
