ՌԴ նախագահ Վլադիմիր Պուտինը ժամանել է Թուրքիա, որտեղ բանակցություններ կվարի իր թուրք գործընկեր Թայիփ Էրդողանի հետ, ինչպես նաև կմասնակցի «Թուրքական հոսք» գազատարի շահագործման հանձնման արարողությանը:
Պետության ղեկավարի մամուլի ծառայությունում պարզաբանել են, որ հունվարի 7-ի երեկոյան պլանավորված պետական միջոցառումներ չկան. Պուտինի աշխատանքային ծրագիրը նախատեսված է հունվարի 8-ին:
ՌԴ նախագահի աշխատանքային այցը Ստամբուլ նախապես հայտարարվել է Կրեմլի մամուլի ծառայության կողմից: Ըստ հաղորդագրության, Պուտինը կայցելի Թուրքիայի Հանրապետություն՝ «Թուրքական հոսքի» գործարկման արարողությանը մասնակցելու համար: Նաև չորեքշաբթի տեղի կունենան նրա բանակցությունները Էրդողանի հետ: ՌԴ նախագահի մամուլի ծառայության հաղորդմամբ, առաջնորդները մտադիր են խոսել երկկողմ համագործակցության զարգացման և միջազգային հարցերի շուրջ, ներառյալ Սիրիայում և Լիբիայում տիրող իրավիճակը:
Թուրքիա ժամանելուց առաջ, հունվարի 7-ին, Պուտինն այցով գտնվել է Դամասկոսում, որտեղ այցելել է ՍԱՀ-ում ՌԴ զինված ուժերի զորքերի խմբավորման հրամանատարական հենակետ և հանդիպել Սիրիայի նախագահ Բաշար Ասադի հետ:
