Հունվարի 3-ին Իրաքի մայրաքաղաք Բաղդադի օդանավակայանի մոտակայքում ամերիկյան ուժերի ավիահարվածներից սպանվել է իսլամական հեղափոխության պահապանների կորպուսի հատուկ նշանակության ուժերի հրամանատար, գեներալ-մայոր Ղասեմ Սուլեյմանին: Գեներալի մահից հետո խիստ լարված է իրավիճակը ԱՄՆ-Իրան, ԱՄՆ- Իրաք հարաբերություններում:
Իրանի գերագույն հոգևոր առաջնորդ այաթոլլահ Ալի Խամենեին խոստացել է վրեժ լուծել Ղասեմ Սոլեյմանիի սպանության համար՝ նշելով, որ դա պետք է արվի բացեիբաց՝ իրանական Զինուժի ներգրավմամբ: Իրաքը պահանջում է իր տարածքից դուրս բերել ամերիկյան ռազմաբազան:
Թեմայի շուրջ «Առաջին լրատվական»-ի հետ քննարկմանը մասնակցեցին իրանագետ ժաննա Վարդանյանը և արաբագետ Սարգիս Գրիգորյանը:
ԱՄՆ-ի և Իրանի կողմից հնչում են փոխադարձ սպառնալիքներ. արդյո՞ք բաց առճակատման հնարավորություն կա, թե՞ Իրանը կփորձի սպանված գեներալի վրեժը լուծել երրորդ երկրների միջոցով՝ մասնավորապես Իրաքի, Սիրիայի և Լիբանանի տարածքներում ԱՄՆ-ին հարվածներ հասցնելով: Սարգիս Գրիգորյանի դիտարկմամբ՝ այս լարվածությունը երկար ժամանակ է, որ տիրում է. «Երբ Թրամփը եկավ իշխանության, փոխվեց ԱՄՆ-ի քաղաքականությունը տարածաշրջանում՝ այդ թվում նաև Իրանի նկատմամբ: ԱՄՆ-ը վճռական և կտրուկ քայլերով փորձում էր ցույց տալ, որ ամեն ինչ անելու է Իրանի ազդեցությունը տարածաշրջանում թուլացնելու համար: Եվ երկար ժամանակ է տեսնում ենք միջնորդավորված բախումներ…
Սպանվել են ազդեցիկ ֆիգուրներ, իրանական ազդեցությամբ խմբավորումների ղեկավարներ, ինչը լրացուցիչ լարվածություն է առաջացրել տարածաշրջանում: Այնուամենայիվ, կարծում եմ, որ երկու երկրներն էլ՝ ԱՄՆ-ը և Իրանը, պատերազմ չեն ուզում, առճակատման չեն գնա, անմիջական բախումներ չեն լինի, բայց այդ հակասությունների սրացումը իր ազդեցությունը կունենա տարածաշրջանում»:
Մանրամասն՝ տեսանյութում: