Քաղաքագետ Անուշ Սեդրակյանն «Առաջին լրատվական»-ի հետ զրույցում ամփոփելով 2019-ը և պատասխանելով հարցին, թե որոնք էին նախորդ տարվա առանցքային իրողություններն ու զարգացումները, նշեց. «Հեղափոխությունը, ինչքան էլ որ չարագուշակ կանխատեսումներ եղան, հաջողեց: Հեղափոխությունը հաղթեց բովանդակությամբ, ինստիտուցիոնալ մասով՝ ոչ: Եվ դա բնական է և կանխատեսելի էր, որովհետև մենք առաջին հանրապետությունից սկսած՝ ցայսօր ունեցել ենք ինստիտուտների շատ կարճ պատմություն և շատ վատ օրինակ՝ սերտաճած ենք եղել սովետական ինստիտուտներին և մինչև հիմա կաղապարները վերցնում ենք ռուսական ինստիտուտներից, չունենք ֆորմալ համակազմ, որին կարող ենք հետևել, ցավոք չենք էլ ուզում սովորել»:
Քաղաքագետը, անդրադառնալով քաղաքական ուժերի դասավորվածությանը, նշեց, որ իր դիտարկմամբ՝ ընդդիմություն չկա: «Սերժ Սարգսյանը այնպես էր վարժեցրել ընդդիմադիր դաշտը, որ ինստիտուցիոնալ ընդդիմություն չկար, մարդիկ արագ փոխում էին սկզբունքները, և թվում էր, որ այդ վիճակը շարունակվելու է շատ երկար: Շատ ինքնագոհ հանրապետականները կարծում էին, որ այդպես լինելու է հավերժ, բայց ես կարծում էի, որ դա հավերժ չի լինելու, քանի որ ՀՀԿ-ն ուներ ամենահզոր ընդդիմությունը՝ դա հայ ժողովուրդն էր…
Հիմա ունենք հակառակ բալանսը՝ հայ ժողովրդի մեծամասնությունը, գումարած Նիկոլ Փաշինյանը՝ իր թիմով, մյուս կողմում՝ «հներն» են՝ նախկին իշխող ուժերը, և ունենք ծիլ տվող ընդդիմության ջանքեր: Դեռևս չենք կարող խոսել լիարժեք ինստիտուցիոնալ ընդդիմության մասին, որովհետև չի կարող լինել ընդդիմություն՝ առանց հանրային մեծաթիվ աջակցության: Իսկ հանրային աջակցություն դեռևս ունի «Իմ քայլը»: Բայց էյֆորիան հավերժ չի կարող լինել: Դրա համար բոլորը պետք է աշխատեն… Ինչ վերաբերում է նախկիններին՝ նրանցից չի կարող բխել հակահեղափոխական վտանգ»:
Մանրամասն՝ տեսանյութում: