Իրաքում իրանցի գեներալ Ղասեմ Սոլեյմանիի սպանությունից հետո սրված իրավիճակի ֆոնին Գերմանիան կվերաբաշխի Իրաքում գտնվող զինված ուժերը տեղափոխելով դրանք Քուվեյթ և Հորդանան։ Այդ մասին տեղեկացնում է DPA գործակալությունը հղում կատարելով Գերմանիայի արտաքին գործերի և պաշտպանության նախարարներ Հայքո Մաասաի և Անեգրեթ Քրամփ Քարենբաուերի բունդեսթագին ուղղված նամակում։
«Իհարկե, մենք հարգանքով ենք վերաբերվում Իրաքի կառավարության ցանկացած ինքնիշխան որոշմանը: Սկզբունքորեն, մենք պատրաստ ենք շարունակել ցուցաբերել մեր աջակցությունը միջազգային շրջանակներում, եթե Իրաքի կողմից լինի դրա պահանջը և իրավիճակը դա թույլ տա։ Այնտեղ (Բաղդադում և Թաջիում) տեղակայված զինվորները շուտով կտեղափոխվեն Հորդանան և Քուվեյթ: Երբ վերապատրաստումը (իրաքցի զինվորների) վերսկսվի, դրանք կարող են վերադարձվել », – գրված է նամակում:
Ավելի վաղ Իրաքի խորհրդարանը որոշում է կայացրել երկրից օտար զորքերը դուրս բերելու մասին։ Որոշումը կայացվել է այն բանից հետո, երբ Բաղդադի միջազգային օդանավակայանի մոտ իրականացվել է ռազմական գործողություն, որի արդյունքում սպանվել է իրանյան ազդեցիկ զինվորական Ղասեմ Սոլեյմանին։ Գործողությունը համաձայնեցված չի եղել Իրաքի ռազմական ուժերի հետ։