«Ամենամեծ ստերն ասվում են ընտրություններից առաջ, որսից հետո և պատերազմի ժամանակ: Այսօր մենք գտնվում ենք հիբրիդային պատերազմի մեջ, պատերազմական գործողությունների տարածք է դարձել կիբեր տարածքը, «ֆեյքնյուզ» կոչվածը գրոհում է. ինչպիսի՞ն կլինեն դրա հետևանքները աշխարհում և հատկապես Հայաստանում: Վերջին շրջանի ներքաղաքական իրադարձությունների և զարգացումների շուրջ «Առաջին լրատվական»-ի հետ զրուցում անդրադառնալով այս դիտարկմանը՝ պատմաբան Վահրամ Թոքմաջյանը նշեց. «Հասարակությունն ունի լուրջ մարտահրավեր, և այդ մարտահրավերը գալիս է մեդիադաշտից՝ ֆեյքնյուզի տեսքով: Վերջին իրադարձությունները եկան ապացուցելու, որ դա այդպես է:
2016թ. ապրիլյան պատերազմի ժամանակ բազմաթիվ մարդիկ շատ լուրջ աշխատանք կատարեցին մեդիա դաշտում, որպեսզի հասարակությանը տարատեսակ մոլորություններից և ահաբեկող լուրերից հետ պահեն… Հակառակ կողմում այդպիսի լուրեր տարածողներն էին՝ ցավոք հայկական տիրույթից, այսինքն՝ պատերազմն ընթանում էր երկու ճակատում՝ ռազմաճակատում, որտեղ կռվում էին մեր զինվորները, և մեդիադաշտում, որտեղ փորձագետները հսկայական աշխատանք էին կատարում:
Այսօր հասարակության մեծ մասը համացանցից օգտվելու հնարավորություն ունի, այլ էր վիճակը 5-10, 20 տարի առաջ, և ինչքան համացանցում ունենք հասանելիություն, այնքան անպաշտպան ենք համացանցի դիմաց… Հեղափոխությունից հետո մեզանում տեղի չի ունեցել ռեսուրսների վերաբաշխում, և նրանք, ովքեր ձգտում են ռևանշիզմի, կամ ինչ-ինչ նկատառումներից ելնելով՝ փորձում են թունավորել առօրյա դաշտը, իրողությունները, ունեն հսկայական ֆինանսական միջոցներ և հնարավորություն համացանցի միջոցով ազդելու, ինչ-որ բան փոխելու համար հարկ եղած դեպքում խուճապի մատնելու և գործընթացներն իրենց ուզած հունով առաջ տանելու համար: Ժամ առաջ պետք է այդ մարդկանց զրկել այդպիսի ռեսուրսներ ունենալու հնարավորությունից… »:
Մանրամասն՝ տեսանյութում: