Ստամբուլի քաղաքապետ Էքրեմ Իմամօղլուն Սուրբ ծննդի առիթով այցելել է Ստամբուլի հայոց պատրիարքարան և շնորհավորել: Հետո նա այցելել է հայկական եկեղեցի:
Այցն ինքնին բավականին հատկանշական իրողություն է ընդհանուր միջազգային համայնապատկերում և առավել նշանային կարող է դիտարկվել մերձավորարևելյան հայտնի նոր զարգացումների և հեռանկարների համատեքստում, որոնք կարող են բերել ռեգիոնալ մեծ խաղում վերադասավորումների: Դրա արդյունքը կամ հետևանքը կարող է լինել այն, որ էապես նվազի Թուրքիայի դերը՝ որպես սցենարային հավանական զարգացումներից մեկի կամ նույնիսկ մի քանիսի հավանական տարբերակ: Դա իր հերթին էական ազդեցություն կարող է ունենալ Էրդողանի ներքին քաղաքական դիրքերի վրա, որոնք արդեն իսկ ենթարկվել են նշանային ցնցման հենց Ստամբուլում: 2019 թվականին Էրդողանը Ստամբուլում քաղաքապետի ընտրություններում պարտվեց: Ընդ որում, նրա կուսակցության թեկնածուն պարտվեց երկու անգամ: Առաջինից հետո Թուրքիայի նախագահը հասավ նրան, որ ԿԸՀ-ն չեղարկեց արդյունքը, սակայն երկրորդ անգամ ընդդիմադիր թեկնածուն դարձյալ հաղթեց, այն էլ՝ ավելի համոզիչ: Փորձագետները գնահատեցին, որ Ստամբուլից սկսված Էրդողանի վերելքը Ստամբուլում էլ կավարտվի, և այնտեղից սկսվում է նրա անկումը:
Այն, որ Թուրքիայի նախագահն իր արտաքին քաղաքականության համատեքստում դառնում է ավելի ագրեսիվ, գործնականում խոսում է հենց ներքին կյանքում նրա դիրքերի ավելի թույլ լինելու մասին, ինչն էլ նա փորձում է փոխհատուցել արտաքին ագրեսիվությամբ: Սակայն արտաքին միջավայրում Թուրքիայի մարտահրավերները իրապես ուժգնանում են ու բարդանում: Գործնականում Անկարան ներկայումս միայն Մոսկվայի հետ է պահպանում, այսպես ասած, անամպ՝ առերևույթ անամպ հարաբերություն, ինչը, սակայն, չափազանց քիչ է մերձավորարևելյան նոր իրադրության և Իրանի ակնհայտորեն նոր և առավել հավակնոտ դերի պայմաններում:
Իսկ 2019 թվականին Էրդողանը ոչ միայն Ստամբուլում ստացավ ուժգին հարված ու կրկնակի, այլ նաև Վաշինգտոնում՝ դարձյալ կրկնակի: Կոնգրեսի երկու պալատները ճանաչեցին Հայոց ցեղասպանությունը, իսկ Սպիտակ տունն ակնհայտորեն չխոչընդոտեց դրան՝ այդպիսով արձանագրելով հայկական հարցի միջազգային նոր մակարդակ ու հարթություն:
2019-ի այդ ֆոնին, նաև 2020-ի ռեգիոնալ դրամատիկ մեկնարկի համատեքստում Ստամբուլի ընդդիմադիր քաղաքապետի այցը Հայոց պատրիարքարան և շնորհավորանքը Սուրբծննդյան կապակցությամբ ստանում է անշուշտ բավականին ընդգրկուն քաղաքական տողատակ՝ դրանում հայկական գործոնի նշանակալիության ևս մի հատկանշական դրսևորմամբ, նկատի ունենալով նաև հանգամանքը, որ Էրդողանը հենց, այսպես ասած, հայկական ծագման մեղադրանքն էր նաև փորձում օգտագործել Ստամբուլի քաղաքապետի ընտրությանն իր մրցակցի դեմ, ինչը փաստորեն չօգնեց Էրդողանին:
